BAKI, AzerVoice, Nailə Babazadə
Türkiyə Xarici İşlər Nazirliyindən əldə edilən məlumata görə, xarici işlər naziri Hakan Fidan NATO Qərargahındakı görüşlər çərçivəsində NATO Baş katibi Mark Rutte, Aİ-nin Xarici Siyasət və Təhlükəsizlik üzrə Ali Nümayəndəsi və Avropa Komissiyası sədrinin müavini Kaja Kallas, Avropa Komissiyasının Genişlənmə üzrə komissarı Marta Kos, Böyük Britaniyanın xarici işlər naziri Yvette Cooper, İspaniya xarici işlər naziri Xose Manuel Albares və digər bir sıra həmkarları ilə ikitərəfli görüşlər keçirməyi planlaşdırır.
AzerVoice xəbər verir ki, Brüsseldə yerləşən NATO Qərargahında keçiriləcək görüşlər, iyun ayında keçirilmiş Haaqa Zirvəsinin nəticələrinin nəzərdən keçirilməsi, həmçinin Türkiyənin ev sahibliyi ilə 7–8 iyul 2026-cı ildə Ankarada təşkil olunacaq NATO Zirvəsinə hazırlıq çərçivəsində nazirlər arasında ilk fikir mübadiləsinə imkan yaradacaq.
Məlumata görə, NATO Xarici İşlər Nazirləri səviyyəsində aparılacaq müzakirələr iki hissədən ibarət olacaq. İlk hissədə yalnız NATO üzvü ölkələrin xarici işlər nazirləri iştirak edəcək və İttifaqın gündəmində duran əsas mövzular dəyərləndiriləcək. Bu mərhələdə xüsusilə Rusiya–Ukrayna müharibəsi və Avroatlantik təhlükəsizlik mühitində son dövrdə baş verən inkişafların əsas müzakirə mövzusu olacağı gözlənilir.
