BAKI, AzerVoice, Orxan Qədirzadə
Türkiyə Prezidenti Rəcəb Tayyib Ərdoğan təbii fəlakətlərdən, xüsusilə zəlzələlərdən zərər çəkmiş vətəndaşlar üçün inşa edilən 455 mininci mənzilin qanuni sahiblərinə təqdim edildiyini bildirib.
AzerVoice xəbər verir ki, Prezident bu barədə Hatay vilayətində keçirilən mərasimdə – təbii fəlakətlərdən zərərçəkənlər üçün tikilən yaşayış sahələrinin püşkatması, açarların təqdimatı və tamamlanmış investisiya layihələrinin rəsmi açılışı zamanı çıxışında danışıb.
Ərdoğanın sözlərinə görə, zəlzələnin təsir göstərdiyi 11 vilayətdə inşa olunan yaşayış obyektlərinin mərhələli şəkildə vətəndaşların istifadəsinə verilməsi davam etdirilir. O qeyd edib ki, layihələr çərçivəsində dövlət qurumları bölgələrdə fasiləsiz fəaliyyət göstərib.
Prezident bildirib ki, bərpa və yenidənqurma işləri 11 vilayətdə 174 layihə üzrə 3 481 tikinti sahəsində aparılıb. Bu prosesdə memar, mühəndis və tikinti işçiləri də daxil olmaqla təxminən 200 min nəfər iştirak edib.
Çıxışında təhlükəsizlik məsələlərinə də toxunan Ərdoğan qeyd edib ki, Türkiyə terrorla mübarizə və ictimai sabitliyin qorunması istiqamətində fəaliyyətlərini davam etdirir. O vurğulayıb ki, ölkədə müxtəlif etnik və dini qruplar birgə yaşayır və dövlət bu birliyin qorunmasını prioritet hesab edir.
Prezident əlavə edib ki, sosial sabitliyi pozmağa yönəlmiş çağırışlara qarşı müvafiq tədbirlər görülür və ölkənin yenidənqurma və inkişaf proqramları davam etdiriləcək.
