BAKI, AzerVoice, Nailə Babazadə
Türkiyə Prezidenti Rəcəb Tayyib Ərdoğan zəlzələnin miqyasını rəqəmlərlə ifadə edərək bildirib ki, fəlakət 11 əyalətdə 14 milyon insana birbaşa təsir edib.
AzerVoice xəbər verir ki, 53 min 697 vətəndaşın həyatını itirdiyi bu fəlakətin Türkiyə iqtisadiyyatına birbaşa və dolayısı ilə ümumi maliyyə yükü 254 milyard dolları tapıb. Bu məbləğ ölkənin 2023-cü il üzrə milli gəlirinin təxminən 9 faizinə bərabərdir.
"Türkiyənin gücünü dünyaya göstərdik" deyən dövlət başçısı ilk dəqiqələrdən etibarən hərəkətə keçildiyini və 650 min personelin sahəyə cəlb edildiyini vurğulayıb. Ərdoğan qeyd edib ki, dövlət-millət həmrəyliyinin ən gözəl nümunəsini nümayiş etdirərək zəlzələnin açdığı yaraları birlikdə sarıblar. Onun sözlərinə görə, Türkiyə 86 milyon olaraq küllərindən yenidən doğulub və öz gücünü bütün dünyaya bir daha göstərib.
Zəlzələ bölgəsində 455 min müstəqil bölmənin tamamlandığını bildirən Prezident müxalifətin "bu evləri bitirə bilməzlər" iddialarına da cavab verib. O, görülən işlərin statistikasını paylaşaraq qeyd edib ki, 433 min 667-si mənzil, 21 min 690-ı iş yeri olmaqla cəmi 455 min 357 müstəqil bölmə artıq tamamlanıb. Təhvil prosesi çərçivəsində dekabrın 27-də Hatayda 455 mininci fəlakət mənzilinin açarları sahiblərinə təslim edilib.
Ərdoğan çıxışının sonunda xüsusi olaraq vurğulayıb ki, bəzi dairələrin siyasi maraq güdməsinə və dezinformasiya yaymasına baxmayaraq, Türkiyə öz iradəsini ortaya qoyaraq 3 il kimi qısa müddətdə şəhərləri yenidən ayağa qaldırmağa nail olub.
