BAKI, VOA, Nailə Babazadə
Türkiyənin Maşın və Kimya Sənayesi (MKE) şirkəti tərəfindən hazırlanan "TOLGA" yaxın hava müdafiə sistemi qlobal silah bazarında asimmetrik təhdidlərə qarşı ən effektiv həll yollarından biri kimi ön plana çıxıb.
VOA xəbər verir ki,MKE baş direktoru İlhami Keleşin bildirdiyinə görə, xüsusilə Rusiya-Ukrayna müharibəsindən sonra dronların ucuz və geniş yayılmış hərbi vasitəyə çevrilməsi yaxın hava müdafiəsi ehtiyacını artırıb. "TOLGA" bu boşluğu doldurmaq üçün Türkiyənin "Polad Qübbə" (Çelik Kubbe) hava hücumundan müdafiə layihəsinin alt seqmentini, yəni çox alçaq hündürlükdəki təhdidləri zərərsizləşdirmək üçün dizayn edilib.
Sistem həm "soft-kill" (elektron maneə), həm də "hard-kill" (fiziki məhv etmə) kabiliyyətlərinə malikdir. "TOLGA" üzərindəki AESA radarı vasitəsilə hədəfi 10 kilometr məsafədən təsbit edir və 4 kilometrdən etibarən atəş gücü ilə müdaxilə etməyə başlayır. Keleş qeyd edib ki, sistemin ən böyük üstünlüyü 12.7 mm-dən 35 mm-ə qədər müxtəlif çaplı silahlardan "polad bulud" yaradan mühimmata sahib olmasıdır. Bu mühimmatlar hədəfin qarşısında dağılaraq sıx metal parçacıqlarından ibarət bulud əmələ gətirir və xüsusilə sürətlə hərəkət edən kamikadze dronları saniyələr ərzində sıradan çıxarır.
MKE-nin "Effektiv, Sadə, Ucuz" (EBU) siyasətinə uyğun olaraq hazırlanan "TOLGA" həmçinin süni intellekt dəstəkli otonom nişanalma sisteminə malikdir. Bu texnologiya dronların mümkün manevrlərini öncədən proqnozlaşdıraraq daha az mühimmatla dəqiq vuruş imkanı yaradır. İlhami Keleş yaxın gələcəkdə sistemə lazer və mikrodalğalı silahların da inteqrasiya olunacağını açıqlayıb. Artıq Misir, Səudiyyə Ərəbistanı və Qətər kimi ölkələrlə ixrac müqavilələri imzalayan "TOLGA"nın Türkiyə Silahlı Qüvvələrinin həm quru, həm də dəniz platformalarında aktiv istifadə edilməsi planlaşdırılır.
