BAKI,VOA, Nailə Babazadə
Türkiyə Böyük Millət Məclisinin (TBMM) sədri Numan Kurtulmuş Xorvatiyada keçirilən "Üç Dəniz Təşəbbüsü Parlament rəhbərlərinin Sammiti"ndə Cənubi Qafqazdakı son vəziyyət və qlobal nəqliyyat dəhlizləri barədə mühüm bəyanatlar verib.
VOA xəbər verir ki, Kurtulmuş Azərbaycanın öz ərazi bütövlüyünü bərpa etməsindən sonra Ermənistanla aparılan danışıqlarda qeydə alınan irəliləyişi məmnuniyyətlə qarşıladıqlarını bildirib. O qeyd edib ki, Bakı və İrəvan arasında əldə olunacaq yekun sülh sazişi təkcə iki ölkə üçün deyil, bütün regionun iqtisadi və logistik imkanları üçün strateji əhəmiyyət kəsb edir:
"Cənubi Qafqazda təmin ediləcək qalıcı sülh regional bağlantısallığı əhəmiyyətli dərəcədə gücləndirəcəkdir."
Strateji Dəhlizlərin Mərkəzi: Türkiyə və Azərbaycan
Numan Kurtulmuş Asiya ilə Avropanı birləşdirən və Cənubi Qafqazdan keçən "Orta Dəhliz" layihəsinin önəmini vurğulayaraq, Türkiyənin bu zəncirdəki strateji rolunu xatırladıb. O, müasir infrastrukturun və "ağıllı" nəqliyyat sistemlərinin regionun qlobal iqtisadiyyata inteqrasiyasını sürətləndirəcəyini deyib.
Qlobal Sistemli Böhran Xəbərdarlığı
Çıxışında dünyadakı geosiyasi gərginliklərə də toxunan TBMM sədri, 1945-ci ildən sonra qurulan beynəlxalq nizamın artıq sarsıldığını və beynəlxalq hüququn güclülər qarşisında təsirsiz qaldığını bildirib. O, çoxmərkəzli yeni dünya nizamının formalaşdığı bu dövrdə ölkələrin ortaq dəyərlər ətrafında daha sıx əməkdaşlıq etməsinin zəruri olduğunu vurğulayıb.
