BAKI,VOA, Orxan Qədirzadə
Türkiyənin Nəqliyyat və İnfrastruktur naziri Abdulkadir Uraloğlu, 23 dekabr 2025-ci ildə Ankarada qəzaya uğrayan, Liviya Baş Qərargah rəisi və hərbi nümayəndə heyətini daşıyan təyyarə ilə bağlı yayılan "İsrail təxribatı" iddialarına aydınlıq gətirib.
VOA xəbər verir ki, CHP Baş sədr müavini Deniz Yavuzyılmazın "eyni anqarda İsrailə məxsus təyyarənin olması və təxribat ehtimalı" barədə səsləndirdiyi fikirlərə cavab verən nazir, bu iddiaların heç bir fakta söykənmədiyini bildirib.Nazir Uraloğlunun açıqlamasından mühüm məqamlar:
Ümumi araşdırmalar nəticəsində hər hansı bir sabotaj izi aşkar edilməyib.
Qəti qərar Türkiyə Baş Prokurorluğu və qəza araşdırma qruplarının yekun hesabatı əsasında, məhkəmə prosesi ilə bəlli olacaq.
Təyyarənin "qara qutu"su, qüllə ilə pilotlar arasında danışıqlar və pilotların daxili söhbətləri artıq təhlil edilib və ilkin nəticələrdə şübhəli məqam tapılmayıb.
Havalimanlarında təhlükəsizlik ən yüksək səviyyədədir və bütün hərəkətlilik kameralar vasitəsilə saniyə-saniyə izlənilir.
Nazir Uraloğlu qeyd edib ki, Liviya təyyarəsinə öz heyəti və yerüstü xidmət personalı xaricində kimsə yaxınlaşmayıb. İddia edilən İsrail təyyarəsi ilə Liviya təyyarəsi arasında normal aviasiya prosedurlarına uyğun məsafə qorunub.
"Xahiş edirik, ictimaiyyəti spekulyativ iddialarla yormayaq və insanların beynini qarışdırmayaq. Biz bu məsələni diqqətlə izləyirik və hər hansı şübhəli sənəd aşkar edilməyib." — Abdulkadir Uraloğlu deyib.
Xatırladaq ki, 23 dekabr 2025-ci ildə Ankarada baş verən bu qəza regionda böyük əks-səda doğurmuşdu. Liviya hərbi elitasını daşıyan təyyarənin qəzaya uğraması müxtəlif geosiyasi nəzəriyyələrin yaranmasına səbəb olsa da, Türkiyə tərəfi texniki nasazlıq ehtimalını ön planda saxlayır.
