Türkiyə Hərbi Hava Qüvvələrinin pilotları terminoloji hazırlıq mərhələsini başa vurduqdan sonra "Eurofighter Typhoon" döyüş təyyarələri üzrə təlim uçuşlarına start verirlər. Türkiyə Milli Müdafiə Nazirliyinin həftəlik brifinqində gələcək "Eurofighter" pilotlarının təlim prosesi ilə bağlı son yeniliklər açıqlanıb. Qeyd olunub ki, 2026-cı ilin avqust ayında başlayan nəzəri və terminoloji hazırlıq yekunlaşıb və pilotlar 7 sentyabr 2026-cı il tarixindən etibarən praktiki təlim uçuşlarına başlayacaqlar.
Təlim uçuşları mərhələsi səkkiz ay davam edəcək və bu mərhələnin ardınca üç aylıq təlimatçı-pilot (instruktor) hazırlığı həyata keçiriləcək.
Türkiyə milli beşinci nəsil qırıcı "KAAN" və digər yerli hava döyüş platformaları ilə silah sistemləri genişmiqyaslı xidmətə daxil olanadək keçid dövründə hava üstünlüyünü təmin etmək məqsədilə Böyük Britaniyadan yeni istehsal olunacaq 20 ədəd "Eurofighter Typhoon" təyyarəsi təhvil alacaq. Bundan əlavə, Qətərdən çox az uçuş saatına malik işlənmiş 12 ədəd "Tranche 3A" təyyarəsinin əldə edilməsi ehtimalı da nəzərdən keçirilir. Bu tədarüklər Türkiyəyə "ECRS" seriyalı AESA radarları və "Meteor" tipli vizual mənzildən kənar idarəolunan "hava-hava" raketləri (BVRAAM) ilə təchiz olunmuş müasir aviapark bəxş edəcək.
Böyük Britaniyanın "BAE Systems" konserni ilə imzalanan saziş 20 ədəd qırıcı təyyarəni, müvafiq sursatları, yardımçı avadanlıqları və texniki dəstəyi əhatə edir və ümumi dəyəri 5,4 milyard funt sterlinq təşkil edir.
