BAKI,VOA, Fərid Mikayılov

Türkiyənin Antalya şəhərində narkotik vasitələrin qanunsuz dövriyyəsinə qarşı keçirilən əməliyyat nəticəsində külli miqdarda dərman preparatı aşkarlanıb.

VOA xəbər verir ki, jandarma qüvvələri tərəfindən Alanya və Muratpaşa rayonlarında həyata keçirilən iki əməliyyat zamanı 425 min ədəd sintetik həb ələ keçirilib.

Məlumata əsasən, əməliyyatlar prokurorluq və narkotiklərlə mübarizə qurumlarının koordinasiyası ilə aparılıb. Saxlanılan 6 şübhəlidən 5-i məhkəmə qərarı ilə həbs edilib.

Bildirilib ki, araşdırmalar zamanı şübhəlilərin qanunsuz resept yazaraq və əlaqəli apteklər vasitəsilə sintetik dərmanları satdıqları müəyyən edilib. Onların bu fəaliyyəti nəticəsində narkotik dövriyyəsi təşkil etdikləri qeyd olunub.

Qeyd olunub ki, əməliyyat çərçivəsində bir özəl tibb müəssisəsində, iki aptekdə və bir avtomobildə aparılan axtarışlar zamanı sübutlar aşkarlanıb.