BAKI,VOA, Nailə Babazadə
Türkiyə Prezident Administrasiyasının Kommunikasiya idarəsinin rəhbəri Burhanəttin Duran sosial media hesabından etdiyi açıqlamada 2026-cı il NATO Dövlət və Hökumət Başçıları Sammitinə ev sahibliyi edəcəklərindən böyük məmnunluq duyduqlarını bildirib.
VOA xəbər verir ki, Duran iyulun yeddisi və səkkizində Ankarada reallaşacaq bu sammitin sadəcə diplomatik bir görüş deyil eyni zamanda qlobal təhlükəsizlik sisteminin gələcəyini müəyyən edəcək kritik bir nöqtə olduğunu vurğulayıb.
Prezident Rəcəb Tayyib Ərdoğanın liderliyi ilə Türkiyənin məsuliyyət götürən və həll yolları istehsal edən bir aktör olaraq qlobal nizamda həlledici rolunu davam etdirdiyini qeyd edən Duran ölkəsinin geostrateji mövqeyi ilə transatlantik təhlükəsizliyin mərkəzində yer aldığını ifadə edib. O Türkiyənin güclü müttəfiqlik şüuru və böhran idarəçiliyindəki effektiv rolu ilə NATO liderlərini qəbul etməyə hazır olduğunu bildirib.
Açıqlamada Türkiyənin sülh sabitlik və ortaq təhlükəsizliyin gücləndirilməsi naminə qətiyyətini bir daha nümayiş etdirəcəyi qeyd olunub. Ekspertlər Ankaranın ev sahibliyi edəcəyi bu yüksək səviyyəli görüşün Türkiyənin beynəlxalq arenadakı diplomatik gücünü və alyans daxilindəki nüfuzunu daha da artıracağını vurğulayırlar.
