BAKI,VOA Orxan Qədirzadə
Türkiyənin Milli Təhsil Nazirliyi (MEB) ölkənin bütün 81 vilayətinə şəxsi məlumatların qorunması sahəsində görüləcək tədbirlərlə bağlı 10 maddədən ibarət yeni təlimat göndərib.
Sənəddə məktəblərdə, təhsil müəssisələrində və nazirliyin mərkəzi və yerli strukturlarında şagirdlərə, valideynlərə, müəllimlərə və digər əməkdaşlara aid şəxsi məlumatların emalı zamanı qanunvericiliyin tələblərinə ciddi riayət olunmasının vacibliyi vurğulanıb.
Təlimata əsasən, şəxsi məlumatlar yalnız xidməti zərurət yarandıqda və qanuni məqsədlər üçün emal edilməli, toplanan məlumatların həcmi zəruri ehtiyacla məhdudlaşdırılmalı, onların aktuallığı qorunmalı və icazəsiz şəxslərin çıxışının qarşısı alınmalıdır.
Yeni qaydalara görə, məktəblərə və digər təhsil qurumlarına məxsus internet saytlarında, sosial şəbəkə hesablarında və onlayn platformalarda şəxsi məlumatların açıq şəkildə paylaşılması qadağan edilir.
Bu çərçivədə şagird sinif siyahıları, şagird nömrələri, şəxsiyyət vəsiqəsi məlumatları, imtahan siyahıları, davamiyyət və qiymət göstəriciləri, sağlamlıq məlumatları, intizam tədbirləri, valideyn məlumatları, əməkdaşların əlaqə vasitələri, eləcə də şagird və işçilərə aid foto və video materiallar ictimaiyyətə açıq platformalarda yayımlana bilməyəcək.
Nazirlik həmçinin məktəb və müəssisələrin internet resurslarında əvvəllər yerləşdirilmiş bütün materialların yenidən nəzərdən keçirilməsini tələb edib.
Şəxsi məlumatlar ehtiva edən siyahılar, sənədlər, fotoşəkillər, videolar, elanlar və digər fayllar açıq girişdən çıxarılacaq.
Tədris fəaliyyəti çərçivəsində foto və video çəkilişi zəruri olduqda isə çəkilişin məqsədi, paylaşılacağı platforma, saxlanma müddəti və məlumatlara çıxış hüququ olan şəxslər əvvəlcədən müəyyən edilməlidir.
Şagirdlərin görüntülərinin paylaşılması zamanı xüsusi həssaslıq göstərilməsi, elan və məlumatlandırmalarda şəxsi məlumatları açıqlamayan üsullardan istifadə olunması tövsiyə edilir.
Nazirlik məktəb rəhbərlərinin, müəllimlərin və digər əməkdaşların şəxsi məlumatların qorunması və informasiya təhlükəsizliyi sahəsində biliklərinin artırılması məqsədilə xüsusi təlim proqramlarına cəlb olunmasını da nəzərdə tutur.
Yeni təlimatda nazirliyin elektron sistemlərinə giriş üçün istifadə olunan istifadəçi adları, şifrələr, təsdiqləmə kodları və digər giriş məlumatlarının üçüncü şəxslərlə paylaşılmasının yolverilməz olduğu vurğulanıb.
Eyni zamanda, icazəsiz proqram təminatı, avtomatlaşdırılmış sistemlər, botlar, makrolar, brauzer əlavələri və məlumat toplama vasitələrinin istifadəsi qadağan edilir.
Nazirlik sistemlərində icazəsiz giriş, məlumatların qanunsuz emalı və ya ötürülməsi, şifrə paylaşılması və üçüncü tərəf proqramlarının istifadəsi aşkar ediləcəyi təqdirdə inzibati və hüquqi tədbirlərin görüləcəyi bildirilib.
Təlimata əsasən, şəxsi məlumatların sızdırılması, icazəsiz giriş halları, məlumatların yanlış ünvanlara göndərilməsi, şübhəli proqramlardan istifadə və ya internet resurslarında şəxsi məlumatların yerləşdirilməsi kimi hallar dərhal məktəb rəhbərliyinə və aidiyyəti qurumlara bildirilməlidir.
