Birləşmiş Ərəb Əmirliklərinin (BƏƏ) yeni təyin olunmuş səfirləri ölkə Prezidenti Məhəmməd bin Zayed Al Nəhyan qarşısında and içiblər.
ArabAZ xəbər verir ki,andiçmə mərasimində BƏƏ Prezidentinin müavini, Baş nazirin müavini və Prezident Məhkəməsinin sədri şeyx Mənsur bin Zayed Al Nəhyan da iştirak edib. Məhəmməd bin Zayed Al Nəhyan yeni səfirlərə fəaliyyətlərində uğurlar arzulayıb və onların təmsil etdikləri ölkələrlə əməkdaşlığın möhkəmləndirilməsinə töhfə vermələrinin vacibliyini vurğulayıb.
Andı İordaniyadakı BƏƏ səfiri Sultan Məhəmməd Səid Əl-Şəmsi, Toqodakı səfir Qanem İsa Əhməd Əl-Fələhi, Macarıstandakı səfir Raşid Abdullah İbrahim Əl-Tuneyci, Ruandadakı səfir Əli İsa Musbəh Əl-Zəabi, Qayanadakı səfir Mühənnəd Süleyman Abdullah Əl-Nəqbi və Tacikistandakı səfir Nasir Hüveytən Təban Əl-Kətbi içib.
BƏƏ Prezidenti səfirlərin yeni vəzifələrində ölkənin beynəlxalq tərəfdaşlıqlarının inkişafına, qarşılıqlı maraqların təmin edilməsinə və uzunmüddətli tərəqqiyə xidmət edən konstruktiv əlaqələrin gücləndirilməsinə töhfə verəcəyinə ümid etdiyini bildirib.
Mərasimdə, həmçinin Prezident Məhkəməsinin xüsusi məsələlər üzrə sədr müavini şeyx Həmdan bin Məhəmməd bin Zayed Al Nəhyan, Prezidentin müşaviri şeyx Məhəmməd bin Həmd bin Tahnun Al Nəhyan, dövlət naziri şeyx Şaxbut bin Nəhyan Al Nəhyan, dövlət nazirinin müavini şeyx Nəhyan bin Seyf Al Nəhyan və digər rəsmi şəxslər iştirak ediblər.
