BAKI,AzerVoice Analitik Təhlil Mərkəzi
İsrail ordusunun yeni hərbi doktrinası - “Düşmənin hücumunu gözləməməli, əksinə onu qabaqlayıcı zərbə ilə vurmalıyıq” prinsipi – çərçivəsində və son müharibədəki səhvlərdən nəticə çıxararaq, İsrailin şimal qüvvələri Livan sərhədi yaxınlığında yeni hərbi təlimləri başa çatdırıb.
İsrail ordusunun Baş Qərargah rəisi Eyal Zamir bəyan edib ki, ordunun qüvvələri əvvəlkindən daha öldürücü zərbələr endirməyə hazırdır və bütün cəbhələrdə belə əməliyyatları həyata keçirmək üçün ordunun sayını və imkanlarını artırmağa dair plan hazırlayıb. O, xüsusilə Livan cəbhəsinə diqqət çəkib.
İsrail mediası Hizbullahın baş katibi Nəim Qasimin son bəyanatlarını “təskinlik mesajı” kimi şərh etsə də - Qasim bildirmişdi ki, “Hizbullah İsrailin onu müharibəyə çəkmək cəhdlərinə uymayıb” – İsrailin Baş Qərargah rəisi yeni doktrina üzrə qabaqlayıcı zərbə prinsipində israrlı olduğunu vurğulayıb.
“Maariv” qəzetinin yazdığına görə, Təl-Əvivdəki qiymətləndirmələr belədir: “İranın bütün regional oxu İsraillə yeni bir müharibəyə hazırlaşır ki, son iki ildə aldığı zərbələrin rüsvayçılığını silə bilsin.” İsrail ordusu isə hesab edir ki, bu müharibə qaçılmazdır və məsələ yalnız vaxtdır. Bu səbəbdən İsrail hücumu gözləmək niyyətində deyil və qabaqlayıcı zərbə endirməyə hazırlaşır.
Yayıma əsasən İran hazırda birbaşa genişmiqyaslı müharibəyə tələsmir, lakin öz silahlı qollarına hazırlıq əmri verir və onları lazım olan hər şeylə təmin edir. Hizbullah çoxlu sayda raketi qaçaqmalçılıq yolu ilə ölkəyə gətirib və istehsal edib; “HƏMAS” Qəzzada dağıdılmış hərbi gücünü yenidən qurmağa başlayıb, həmçinin İordan çayının qərb sahilində hüceyrələrini bərpa edir. “İraq Hizbullahı” əvvəlki müharibədən fərqli olaraq bu dəfə iştirak etməyə hazırlaşır və husilər daha qabaqcıl raketlərlə İsraili yenidən hədəf alacaqlarını açıq bəyan edirlər. Buna görə İsrail ordusu atəşkəsə baxmayaraq Livan və Qəzzaya qarşı gündəlik zərbələri davam etdirir.
Bu çərçivədə, bu həftə həm şimal cəbhəsində, həm də Qərb sahilində çoxmeydanlı hərbi təlimlər keçirilib. Təlimlərin məqsədi – qabaqlayıcı müharibə əməliyyatlarıdır. Baş Qərargahın yekunlarına görə İsrail ordusu, sanki müharibə sabah başlayacaqmış kimi, çox yüksək döyüş hazırlığı səviyyəsinə çatıb.
Zamir sahə komandirləri ilə görüşlərində “hücumla müdafiə” doktrinasını izah edib. Bu doktrina “İsrailə qarşı istənilən hücuma dərhal cavab verərək onu düşmənin ərazisində tammiqyaslı müharibəyə çevirmək” deməkdir.
O bildirib ki, “7 oktyabr 2023-cü il hücumunun və sonrakı hərbi əməliyyatların səhvlərindən sonra ordunun döyüş anlayışlarında əməli və konseptual inqilab baş verir”.
Zamir vurğulayıb ki, düşmən bütün cəbhələrdə “HƏMAS hücumuna bənzər əməliyyat” həyata keçirməyə cəhd göstərəcək və İsrail ordusu bu cəhdləri qabaqlamağa, hücum edən qüvvələri məhv etməyə və onları xaosa sürükləməyə hazırdır. O qeyd edib ki, ordunun hücumları “kütləvi şəkildə kibertəhlükəsizlik və yüksək texnologiyaya əsaslanacaq” və Hava Qüvvələri əsas dayağa çevriləcək – lakin digər qüvvələrin, xüsusilə xüsusi təyinatlı komando bölmələrinin də rolu böyük olacaq.
İsrail Maliyyə Nazirliyindəki mənbələr bildiriblər ki, Zamir şimalda istifadə olunan “Apache” helikopterlərinin çox köhnəlməsi səbəbilə onları yeni döyüş helikopterləri ilə əvəz etmək və onların sayını artırmaq üçün “təcili və təxirəsalınmaz” büdcə tələb edib.
Cümə axşamı İsrail ordusu Livanın cənubunda hərbi eskalasiyanı davam etdirərək Nəbətiyyə və Sur bölgələrinə hava zərbələri endirib. Zərbələr nəticəsində yaralıların olduğu bildirilsə də, vəziyyətləri bəlli deyil. İsrail artilleriyası əvvəlki gün Mays əl-Cəbal ətrafındakı açıq əraziləri də atəşə tutmuşdu. Ordunun iddiasına görə, zərbələr “Hizbullah”a məxsus silah anbarı və yeraltı infrastrukturunu hədəf alıb və bunların bəziləri mülki yaşayış yerlərinə yaxın yerləşdirilib. İsrail ordusu həmçinin “Hizbullah”ın Livanın bir çox bölgəsində hərbi obyektləri bərpa etməyə çalışdığını və bunun İsrail–Livan razılaşmalarının pozulması olduğunu iddia edib.
