BAKI,AzerVoice
Lady Evelyn Cobbold (əsl adı: Evelyn Murray; 17 iyul 1867 – 25 yanvar 1963), Zeynəb Cobbold adı ilə də tanınan, İslamı qəbul etmiş ilk britaniyalı aristokrat qadınlardan biridir. O, səyyah, gündəlik yazarı və ictimai xadim kimi tanınır.
Həyatı
Lady Evelyn 1867-ci ildə Şotlandiyanın Edinburq şəhərində dünyaya
gəlib. O, 7-ci Dunmore qrafı Çarlz Adolfus Murray və Leydi Gertrude
Koukun qızı idi. 1891-ci ildə Misirin Qahirə şəhərində Con Dupuis
Cobbold ilə evləndi və İpsviçdə yerləşən Holywells ailə evində
məskunlaşdılar. Bu evlilikdən üç övladı dünyaya gəldi: Vinifred
Evelin (1892–1965), İvan Cobbold (1897–1944) və Pamela Cobbold
(1900–1932). Lakin, 1922-ci ildə ərindən ayrıldı və Londonda
Glencarron malikanəsində yaşamağa başladı.
İslamla Tanışlığı və Dini Dəyişikliyi
Lady Evelyn uşaqlıq illərinin böyük hissəsini Əlcəzair və Qahirədə keçirib. O, müsəlman dayələrinin himayəsində böyüyüb və özünü erkən yaşlardan müsəlman kimi hiss edib. Ancaq rəsmi olaraq İslamı qəbul etməsi 1915-ci ildə baş verdi. O, bu dini "dünyanın çətinliklərini həll etmək üçün ən uyğun din" olaraq qəbul etdiyini bildirib.
1911-ci ildə dostu Frensis Qordon Aleksander ilə Liviya səhrasına səyahət edib və bu təcrübə onun İslama marağını daha da artırıb. 1912-ci ildə bu səfəri haqqında "Wayfarers in the Libyan Desert" adlı kitabı nəşr etdirdi.
Məkkəyə Həcc Səfəri
1929-cu ildə keçmiş əri vəfat etdikdən sonra, Lady Evelyn Məkkəyə həcc ziyarətinə getməyi planlaşdırdı. 1933-cü ildə, 65 yaşında, həccə gedərək bu ziyarəti yerinə yetirən ilk Britaniya mənşəli müsəlman qadın oldu. O, Səudiyyə Ərəbistanının kralı Əbdüləzizin icazəsi ilə ziyarətini reallaşdırdı. 1934-cü ildə "Pilgrimage to Mecca" adlı kitabında həcc təcrübələrini təsvir etdi.
Onun gündəliyində Kəbəni ilk dəfə görməsi barədə yazdığı təsirli
təsvirlər yer alır:
"Biz hamar mərmər üzərində irəliləyərək Allahın evində -
böyük qara kubun qarşısına gəldik. Burada milyonlarla insan
həyatlarını qurban verib və daha milyonları isə sadəcə onu görməklə
cənnət tapıblar..."
Son İlləri və Ölümü
Lady Evelyn 1963-cü ildə Şotlandiyanın İnverness şəhərində vəfat etdi. O, öz vəsiyyətinə uyğun olaraq Glencarron malikanəsində Məkkəyə istiqamətlənmiş ( üzü Qibləyə) təpədə dəfn edildi. O dövrdə Şotlandiyada müsəlman cənazə namazı qılacaq kimsə olmadığından, Wokingdə yerləşən Şah Cahan məscidinin imamı qarlı havada uzun yol qət edərək onun cənazə namazını qıldı. Məzar daşına isə Qurandan "Allahu nur-us-samawati wal ard" (Allah göylərin və yerin nurudur) ayəsi yazıldı.
Lady Evelyn Cobbold, Britaniya tarixində İslamı qəbul edən və həccə gedən ilk qadın aristokrat kimi yadda qalıb. Onun gündəlikləri və səyahət qeydləri yenidən nəşr edilib və bu günə qədər maraqla oxunur. 2019-cu ildə yazıçı Leila Aboulela "Bird Summons" adlı romanında onun məzarını axtaran üç müsəlman qadının hekayəsini qələmə alıb.
