BAKI,AzerVoice
Liviya Milli Birlik Hökumətinin baş naziri Əbdülhəmid Dbeibə Türkiyənin paytaxtı Ankara şəhərinə rəsmi səfərdən qayıdarkən təyyarənin ağır qəza ilə üzləşməsi nəticəsində Liviya ordusunun Baş Qərargah rəisi Məhəmməd Həddadın və onu müşayiət edən şəxslərin həlak olduğunu elan edib. Dbeibə həlak olanların xatirəsinə həsr etdiyi bəyanatda bildirib ki, hadisə nəticəsində Quru Qoşunlarının Baş Qərargah rəisi, general-leytenant rütbəli Fəturi Qəribil, Hərbi Sənaye Cihazının direktoru, briqada generalı Mahmud Qətiuvi, Baş Qərargah rəisinin müşaviri Məhəmməd Əlsəavi, həmçinin Baş Qərargahın media ofisinin fotoqrafı Məhəmməd Ömər Əhməd Məhcub da həyatını itirib.
Liviya Dövlət Ali Şurası da ayrıca bəyanat yayaraq Baş Qərargah rəisini və onunla birlikdə həlak olan şəxsləri ehtiramla yad edib.
Ankarada Türkiyənin daxili işlər naziri Ali Yerlikaya bildirib ki, Türkiyənin fövqəladə hallar üzrə xidmətlərinin əməkdaşları Ankaranın cənubunda yerləşən Haymana bölgəsində qəzaya uğramış təyyarənin qalıqlarına çata biliblər. Nazir hadisənin bütün detallarının araşdırılması məqsədilə rəsmi istintaqa başlanıldığını təsdiqləyib.
Qəzaya uğrayan təyyarənin “Falcon 50” tipli olduğu, Ankaradan Tripoliyə uçuş həyata keçirdiyi bildirilib. Məlumata görə, təyyarə Ankara ərazisində təcili eniş üçün müraciət edib, lakin bundan sonra onunla əlaqə tamamilə kəsilib.
Məhəmməd Həddad kimdir?
Məhəmməd Həddad 2020-ci ildən etibarən Liviya ordusunun Baş Qərargah rəisi vəzifəsini icra edirdi və 17 fevral inqilabından sonrakı mərhələdə ölkənin ən önəmli hərbi liderlərindən biri sayılırdı.
O, Tripolidən təxminən 200 kilometr şərqdə yerləşən Misrata şəhərində anadan olub və Liviya hərbi institutunun birləşdirilməsi istiqamətində aparılan səylərdə əsas fiqurlardan biri olub. Həddad Birgə Hərbi Komissiyanın “5+5” formatlı iclaslarında da fəal iştirak edib.
2019-cu ildə Tripoliyə qarşı həyata keçirilən hücumların dəf edilməsində, eləcə də paytaxtda və Qərbi Liviya bölgələrində baş vermiş bir sıra silahlı qarşıdurmaların nəzarət altına alınmasında onun adı xüsusi ilə ön plana çıxıb. Bu da onu Milli Birlik Hökuməti daxilində həm hərbi, həm də siyasi baxımdan təsirli şəxslərdən birinə çevirib.
Məhəmməd Həddad vəzifəyə başladığı ilk gündən etibarən bölünmüş hərbi strukturu aradan qaldırmaq, ölkənin suverenliyini qorumağa qadir olan, vahid və nizamlı Liviya ordusu formalaşdırmaq istiqamətində çalışacağını açıq şəkildə bəyan edib.
Baş Qərargah rəisi təyin olunmazdan əvvəl Həddad Mərkəzi Müdafiə Bölgəsinin komandanı və Qərbi Liviya üzrə birgə hərbi birliyin üzvü olub.
O, geniş beynəlxalq hərbi əlaqələr qurmağa xüsusi önəm verib. Xüsusilə Türkiyə ilə hərbi əməkdaşlıq bu baxımdan diqqət çəkib. Həddad bir neçə rəsmi səfər çərçivəsində Türkiyədə olub. 2021-ci ilin avqust ayında isə Liviya sahillərində fəaliyyət göstərən türk hərbi freqatını ziyarət edib. Bu səfər Türkiyənin Liviyadakı dəniz və hərbi-protokol missiyaları çərçivəsində baş tutub.
O, Tripolidə Türkiyənin o dövrdəki müdafiə naziri Hulusi Akarla görüşərək iki ölkə arasında hərbi koordinasiya məsələlərini müzakirə edib. 2023-cü ilin mart ayında isə Romada İtaliya ilə xüsusi təyinatlı qüvvələrin hazırlanmasını və onların imkanlarının gücləndirilməsini nəzərdə tutan hərbi saziş imzalayıb.
Bununla yanaşı, Məhəmməd Həddad Liviya ordusunun “Ümumi Komandanlığı”nın Baş Qərargah rəisi, general-polkovnik Əbdülrəzəq Nəzuri ilə də bir sıra görüşlər keçirib. Xüsusilə Qahirə və Roma şəhərlərində baş tutan görüşlər zamanı Liviya ərazisinin bütövlüyü təsdiqlənib, ABŞ və Avropanın dəstəyi ilə sərhədlərin qorunması üçün birgə hərbi qüvvənin yaradılması məsələləri müzakirə edilib.
