Səudiyyə Ərəbistanı 1448-ci hicri ili ümrə mövsümünün əvvəlində ümrə vizası ilə gələnlərin sayında 22.5 faiz artım qeydə alıb. ArabAZ xəbər verir ki, Həcc və Ümrə Nazirliyi ilə Zəvvarların Təcrübəsi Proqramının yaydığı məlumata görə, Zülhiccə ayının 15-dən Məhərrəm ayının sonuna qədər Krallığa ümrə vizası ilə 931 min 500 zəvvar daxil olub.
Hər iki qurum eyni dövr ərzində xaricdən 1.27 milyondan çox zəvvarın gəldiyini bəyan edib. Bu göstərici Vizyon 2030 və Zəvvarların Təcrübəsi Proqramının hədəfləri çərçivəsində Krallığın ümrə sektorunda davamlı artımın getdiyini əks etdirir. Nazirlik bildirib ki, bu rəqəmlər rəhbərliyin zəvvarlara xidmət göstərilməsinə verdiyi davamlı dəstəyi və dövlət qurumları arasındakı mövcud inteqrasiyanı nümayiş etdirir. Eyni zamanda ümrə ziyarətçilərinin və gələnlərin təcrübəsini təkmilləşdirməyə yönəlmiş rəqəmsal və operativ xidmətlərdəki davamlı təkmilləşdirmələri sübut edir.
Nazirliyin verdiyi məlumata görə, xaricdən gələn ümrə zəvvarlarının 75 faizi Krallığa hava limanları vasitəsilə daxil olub, qalan 24 faizi isə quru və dəniz limanlarından istifadə edib.
Zəvvarların gəldiyi ölkələr arasında Pakistan təxminən 200 min zəvvarla birinci yerdə qərarlaşıb, ondan sonrakı yerləri isə 170 min zəvvarla İndoneziya və 130000 zəvvarla İraq tutub.
Nazirlik səfərin planlaşdırılmasından tutmuş ölkədən ayrılana qədər daha rahat və yüksək keyfiyyətli ümrə səyahətini təmin etmək üçün rəqəmsal və operativ xidmətləri təkmilləşdirməyə, xidmətlərə əlçatanlığı yaxşılaşdırmağa və əməliyyat səmərəliliyini artırmağa davam etdiyini vurğulayıb.
