BAKI,VOA Analitik Təhlil Mərkəzi
Türkiyədə PKK terror təşkilatının fəaliyyətinin sona çatması istiqamətində atılan addımlar ölkənin təhlükəsizlik siyasəti və regiondakı geosiyasi rolu ilə bağlı müzakirələri yenidən gündəmə gətirib.
Analitiklər bildirirlər ki, qırx ildən artıq davam edən terror və silahlı qarşıdurmanın sona çatması Türkiyənin təhlükəsizlik strategiyasında yeni mərhələnin başlanğıcı ola bilər. Onların qənaətincə, terror təhlükəsinin azalması region ölkələri arasında iqtisadi əməkdaşlığın genişlənməsinə və sabitliyin möhkəmlənməsinə də töhfə verə bilər.
Ekspertlərin sözlərinə görə, PKK uzun illər beynəlxalq güclərin maraqlarının toqquşduğu geosiyasi müstəvidə fəaliyyət göstərib. Onlar hesab edirlər ki, təşkilatın zəifləməsi və ya tamamilə fəaliyyətini dayandırması Türkiyənin ərazi bütövlüyünə qarşı yönəlmiş təşəbbüslərin uğursuzluğa düçar olmasının göstəricisi kimi qiymətləndirilə bilər.
Ekspertlər qeyd edirlər ki, PKK amilinin gündəmdən çıxması İraq, Suriya və İran üçün də yeni imkanlar yarada bilər. Terror riskinin azalması sərhəd təhlükəsizliyinin güclənməsinə, regional ticarətin genişlənməsinə və investisiya mühitinin yaxşılaşmasına müsbət təsir göstərə bilər.
Ekspertlər eyni zamanda Türkiyənin son illərdə regional proseslərdə daha fəal rol oynadığını vurğulayırlar. Liviyada siyasi proseslərə dəstək, Suriyada sabitliyin bərpasına yönəlmiş təşəbbüslər, Azərbaycanın Qarabağda ərazi bütövlüyünü təmin etməsinə verilən dəstək, Rusiya-Ukrayna müharibəsində vasitəçilik cəhdləri və İraqın "İnkişaf Yolu" layihəsində iştirak Ankaranın regional nüfuzunu artıran əsas amillər sırasındadır.
Analitiklər hesab edirlər ki, Türkiyə son illər təkcə öz milli təhlükəsizliyini təmin etməyə deyil, həm də regionda sabitlik, əməkdaşlıq və iqtisadi inkişafın təşviqinə yönəlmiş siyasət yürüdür.
Bununla yanaşı, ekspertlər beynəlxalq təhlükəsizlik sisteminin effektivliyi ilə bağlı da müzakirələrin davam etdiyini bildirirlər. Onların fikrincə, qlobal münaqişələrin həllində böyük dövlətlərin rolu ilə bağlı tənqidlər fonunda Türkiyənin vasitəçilik və regional əməkdaşlıq təşəbbüsləri beynəlxalq arenada daha çox diqqət çəkir.
