Milyonlarla dollar dəyərindəki nadir daş-qaşlar və Şərqin iki parlaq ulduzu lüks brendin yeni qlobal layihəsində bir araya gəlib.
İsveçrənin dünyaca məşhur "Chopard" zərgərlik evi sosial media hesablarında livanlı model Nur Arida və hazırda Ər-Riyadda yaşayan argentinalı gözəl Xorxina Rodrigesi diqqət mərkəzinə çəkib. Lüks brend Kann Kinofestivalının 79-cu buraxılışından xüsusi kadrlar paylaşaraq, hər iki ulduzun qırmızı xalçaya hazırlıq anlarını və gözoxşayan dəbdəbəli obrazlarını nümayiş etdirib.
Kann festivalında "Chopard’s Miracles" şousunun möhtəşəm finalında podiuma çıxan 2023-cü ilin "İlin ərəb qadını" Nur Arida dünya ulduzları ilə eyni səhnəni bölüşərək zərifliyi ilə gecəyə damğa vurub. Fransanın "Boucheron" brendinin qlobal siması və Türkiyənin "Nocturne" markasının səfiri olan Arida, eyni zamanda ərəb qadınlarının özünü kəşf etmə yolçuluğundan bəhs edən "Confidence Is Queen" realiti-şousu ilə tezliklə ekranları fəth etməyə hazırlanır.
"Chopard"ın uzunmüddətli qlobal səfiri Xorxina Rodriges isə brendin Nyu-Yorkda lentə alınan fotosessiyasında milyonlarla dollar dəyərində nadir zümrüd, brilyant və rubinlərlə bəzədilmiş "Red Carpet Collection" zərgərlik nümunələri ilə parlaq obraz yaradıb. Futbol əfsanəsi Kriştianu Ronaldonun həyat yoldaşı olan Rodriges, brendin həm də Nyu-York və Malorkada çəkilən yeni qlobal kampaniyasının əsas ulduzuna çevrilib.
