BAKI, AzerVoice, Nailə Babazadə
Fransa parlamentində bir qrup deputat “islamçı separatizm”lə mübarizəyə dair 17 tövsiyədən ibarət yeni hesabat təqdim edib. Sənəddə ən çox müzakirə yaradan təkliflərdən biri 16 yaşınadək qızların hicab taxmasının qadağan olunması və dini təşkilatlara nəzarətin sərtləşdirilməsidir.
Hesabatda Ifop-un araşdırmasına istinad edilərək bildirilir ki, hazırda Fransada 15–24 yaş arası müsəlman qızların 44 faizi hicab taxır. 2003-cü ildə bu göstərici cəmi 16 faiz idi.
Sənəddə aşağıdakı əsas təkliflər yer alıb:
1. Məktəb müşayiətçilərinə hicab qadağası
Hesabatda məktəbli qrupları müşayiət edən şəxslərə hicab yasağı yenidən müzakirəyə çıxarılır. Senat bu qadağanı əvvəllər dəfələrlə təsdiqləsə də, 2019-cu ildə Milli Assambleyaya qədər çatmamışdı.
2. Məcburi nikahların qarşısının alınması
Fransız konsulluqlarında evlənəcək cütlüklə fərdi söhbətlərin aparılması, təzyiq və məcburiyyət faktlarının aşkarlanması təklif edilir.
3. Məscidlərin və dini assosiasiyaların maliyyəsinə nəzarət
Hesabat müəllifləri tələb edir:
xarici maliyyənin izlənməsi,
dini qurumların hesabatlılığının artırılması,
məscidlərin siyasi məqsədlər üçün istifadəsinin qarşısının alınması.
4. İdmanda tam dünyəvilik
Təklifə görə, idman federasiyalarının qaydaları dəyişdirilməli və idman sahəsində dini simvollara tam qadağa tətbiq olunmalıdır.
5. Vizaların verilməsinin MİD-ə verilməsi
Viza nəzarətinin Daxili İşlər Nazirliyinə verilməsi tövsiyə olunur. Məqsəd “radikal islamçı şəbəkələrlə” əlaqəli şəxslərin Fransa ərazisinə girişinin bloklanmasıdır.
6. Bələdiyyə rəsmilərinə də dünyəvilik tələbləri
Hesabatda merlərə, bələdiyyə üzvlərinə və seçkili şəxslərə neytrallıq qaydalarının — o cümlədən dini simvollara qadağanın — tətbiqi tələb olunur.
Sənəddə “islamçı layihə” Fransanı dini prinsiplərə əsasən dəyişdirməyə çalışan ideologiya kimi xarakterizə olunur. Bununla yanaşı, tədbirlərin islam dininə qarşı yönəlmədiyi qeyd edilir.
Hesabat parlamentə təqdim edilərsə, Fransada geniş ictimai debatlar gözlənilir. Xüsusilə hicab və dünyəvilik məsələsi ölkədə artıq uzun illərdir siyasi gərginlik mövzusudur.
