BAKI,VOA Orxan Qədirzadə
Müsəlman istehlakçıların halal həyat tərzi ilə əlaqəli sektorlarda xərcləri 2024-cü ildə 2,6 trilyon ABŞ dollarına yüksəlib.
Bu barədə strateji araşdırma şirkəti DinarStandard tərəfindən hazırlanan 2025–2026-cı illər üzrə hesabatda bildirilib.
Hesabata əsasən, istehlak xərclərinə halal qida məhsulları, əczaçılıq məhsulları, kosmetika, konservativ moda, turizm, media və əyləncə sektorları daxildir.
Hesabatın təqdimatı İstanbul şəhərində Türkiyə Prezident Administrasiyasının İnvestisiya və Maliyyə İdarəsinin dəstəyi və İbn Xəldun Universitetinin təşkilatçılığı ilə keçirilən tədbirdə baş tutub.
Araşdırmaya görə, halal qida və içki sektoru islam iqtisadiyyatının ən böyük seqmenti olaraq qalır. Hazırda qlobal halal qida və içki bazarında istehlak xərcləri 1,53 trilyon dollar təşkil edir. Analitiklər bu göstəricinin 2029-cu ilədək 2,06 trilyon dollara yüksələcəyini proqnozlaşdırırlar.
Hesabatda Türkiyənin islam iqtisadiyyatındakı mövqeyinin əhəmiyyətli dərəcədə gücləndiyi vurğulanıb. Belə ki, ölkə Qlobal İslam İqtisadiyyatı İndeksi (GIEI) reytinqində 9-cu pillədən 6-cı yerə yüksəlib.
Türkiyə geniş daxili bazarı və inkişaf etmiş istehsal infrastrukturu sayəsində halal iqtisadiyyatın aparıcı mərkəzlərindən biri hesab olunur. Ölkədə halal məhsullar, turizm və qida sənayesi sahələrində istehlak xərcləri 2024-cü ildə 235 milyard dollara çatıb. Eyni zamanda Türkiyə konservativ moda sənayesində də dünyanın əsas bazarlarından biri kimi mövqeyini qoruyur.
Hesabat müəlliflərinin proqnozlarına görə, 2029-cu ilə qədər müsəlman istehlakçıların halal qida, əczaçılıq, kosmetika, konservativ moda, turizm, media və əyləncə sektorları üzrə ümumi xərcləri 3,56 trilyon dollara yüksələcək.
Bununla yanaşı, islam maliyyəsi sektorunun həcminin də əhəmiyyətli dərəcədə artaraq 9,72 trilyon dollara çatacağı gözlənilir. Ümumi orta illik artım tempinin isə 6,5 faiz təşkil edəcəyi bildirilir.
Qlobal İslam İqtisadiyyatı İndeksində ilk yeri Malaziya tutur. Sonrakı pillələrdə BƏƏ, Səudiyyə Ərəbistanı, İndonezia, Bəhreyin və Türkiyə qərarlaşıb.
