Səudiyyə Ərəbistanının sürətlə genişlənən canlı musiqi sektoru bu ilin sentyabr ayında daha bir məşhur simanı qəbul etməyə hazırlaşır. Kanadanın dünyaca ünlü "drim-pop" (dream-pop) ifaçısı "Ghostly Kisses" karyerasında ilk dəfə olaraq Krallıqda səhnəyə çıxacaq.

Tanınmış müğənni və bəstəkar Yaxın Şərq turnesinə məhz Səudiyyə Ərəbistanından start verəcək. O, ilk olaraq sentyabrın 3-də Ciddə şəhərində, növbəti gün - sentyabrın 4-də isə paytaxt Ər-Riyadda musiqisevərlərin qarşısında çıxış edəcək.

View this post on Instagram

A post shared by Ghostly Kisses (@ghostlykisses)

Atmosferik səslənməsi, sehrli vokalı və kinematoqrafik səhnə performansları ilə tanınan "Ghostly Kisses" elektro-pop və melankolik üslubları birləşdirərək beynəlxalq aləmdə böyük dinləyici kütləsi qazanıb.

Hər iki konsertin keçiriləcəyi məkanlar və tədbirlərlə bağlı digər təfərrüatlar hələlik açıqlanmayıb. Yaxın həftələrdə ətraflı məlumatın veriləcəyi gözlənilir.

"Ghostly Kisses" layihəsinin arxasında kanadalı müğənni və mahnı müəllifi Margo Sove (Margaux Sauve), habelə bəstəkar və pianoçu Lui-Etyen Sante (Louis-Etienne Santais) dayanır. Margo Sove pop, indi və elektron musiqi sintezindən yaranan təkrarolunmaz üslubu, emosional sözləri və xüsusi vokal tembri ilə seçilir. Müğənni bu layihəyə 2010-cu illərin ortalarında başlayıb və qısa müddətdə səmimi ifaları ilə diqqəti cəlb edə bilib.

Beş yaşından skripka dərsləri alan Sove psixologiya fakültəsində təhsil alarkən ona hədiyyə edilən sintezatordan sonra gizlicə mahnılar yazmağa başlayıb. "Men I Trust" qrupunun üzvü Draqos Kiryakın (Dragos Chiriac) həvəsləndirməsi ilə o, musiqi sahəsində addımlamağa başlayıb və nəticədə Lui-Etyen Sante ilə əməkdaşlığa imza atıb. "Ghostly Kisses" səhnə adı Uilyam Folknerin "Une ballade des dames perdues" şeirindən ilhamlanaraq götürülüb ki, bu da Sovenin vokal üslubu ilə tam üst-üstə düşür.

Qrup "The City Holds My Heart", "Empty Note" və "Where Do Lovers Go" kimi məşhur trekləri ilə beynəlxalq səviyyədə böyük şöhrət qazanıb.

Musiqi dueti 2022-ci ildə "Heaven, Wait" adlı ilk albomunu, 2024-cü ildə isə "Darkroom" albomunu işıq üzünə çıxarıb. Sonuncu albom pərəstişkarlarının anonim şəkildə paylaşdığı etiraflardan və hekayələrdən ilhamlanaraq ərsəyə gətirilib; burada sevgi, kədər və insani hissələr musiqi melodiyalarına çevrilib.

Həm intim, həm də kinematoqrafik musiqisi ilə "Ghostly Kisses" Şimali Amerika və Avropa üzrə turlarda, eləcə də "SXSW" və Monreal Beynəlxalq Caz Festivalında çıxış edərək böyük pərəstişkar ordusu toplayıb. Onların mahnıları "Netflix"in "The Rain" və "Skam Italia" kimi məşhur seriallarında saundtrek kimi səslənib.