İsveçin H&M şirkəti livanlı dizayner Elie Saab ilə əməkdaşlıq çərçivəsində yeni kolleksiya hazırladığını açıqlayıb.
Bu barədə ArabAZ məlumat verir.Məlumata görə, kolleksiya oktyabrın 22-də satışa çıxarılacaq. Buraya qadın və kişi geyimləri, həmçinin ayaqqabı və digər aksesuarlar daxil olacaq.
Kolleksiyada Elie Saabın üslubunu əks etdirən bəzəkli donlar, parıltılı geyimlər və kəskin kəsimli kostyumlar yer alacaq. Dizaynlarda incə krujeva, keçidli payetlər və brendin monoqramlarından istifadə olunub.
H&M-in yaradıcı məsləhətçisi və qadın geyimləri üzrə dizayn rəhbəri Ann-Sofi Yohansson əməkdaşlığı “əlamətdar” adlandırıb. Elie Saab isə kolleksiyanın onun yaradıcılıq dünyasını sevən insanlar üçün hazırlandığını bildirib.
Kolleksiya dünya üzrə seçilmiş H&M mağazalarında və şirkətin onlayn platformasında satışa təqdim ediləcək.
