BAKI, AzerVoice
Türkiyə Futbol Federasiyasının (TFF) yaydığı məlumata görə, A Millî Komanda 2026 FIFA Dünya Çempionatının Avropa zonası üzrə seçmə mərhələsində mübarizəyə sentyabr ayında başlayacaq. Türkiyə, E qrupundakı ilk ev qarşılaşmasını 2024 Avropa çempionu İspaniya ilə keçirəcək.
AzerVoice xəbər verir ki, 7 sentyabr bazar günü saat 22:45-də start götürəcək oyun Konya şəhərində yerləşən Medaş Konya Böyükşəhər Stadionunda baş tutacaq.
TFF-nin açıqlamasında qeyd olunur ki, A Millî Komanda Konya stadionunda daha əvvəl 8 oyuna çıxıb. Bunların 7-si rəsmi, biri isə yoldaşlıq matçı olub. Türkiyə bu görüşlərdə 4 qələbə, 2 heç-heçə və 2 məğlubiyyət alıb. Komanda ümumilikdə 15 qol vurub, 7 qol buraxıb.
Medaş Konya Böyükşəhər Stadionu, daha əvvəl unudulmaz oyunlara da ev sahibliyi edib. Burada Türkiyə millisi EURO 2016 seçmə mərhələsində Hollandiya və İslandiyanı, EURO 2020-də Fransa, EURO 2024-də isə Latviyanı məğlub edib. Xüsusilə 2015-ci ildə İslandiyaya Selçuk İnanın son dəqiqə qolu ilə qalib gəlinməsi və 2019-cu ildə Fransaya qarşı tarixi 2:0 hesablı qələbə xatırlanır. 2023-cü ildə isə Türkiyə Latviya üzərində 4:0 hesablı ilk ev qələbəsini qazanaraq EURO 2024-ə vəsiqə əldə etmişdi.
Türkiyə millisi seçmə mərhələdəki ilk oyununu 4 sentyabr cümə axşamı Gürcüstana qarşı səfərdə keçirəcək. Görüş Tiflisdəki Boris Paichadze Milli Stadionunda Bakı vaxtı ilə saat 20:00-da başlayacaq.
