BAKI, AzerVoice, Fərid Mikayılov
Robert Levandovski Səudiyyə Ərəbistanından gələn təkliflərə baxmayaraq, Barselonada qalmaq qərarını verib və bu mövsüm transferləri nəzərdən keçirməyəcək.
AzerVoice xəbər verir ki, 36 yaşlı forvardın Kataloniya klubu ilə müqaviləsi 2026-cı ilə qədər qüvvədədir.
Klub rəhbərliyi maliyyə baxımından onun ayrılmasını müsbət qiymətləndirə biləcəkdi, lakin Levandovski rəhbərliyin etimadını qarşılıqsız qoymamağa və müqaviləsinə sadiq qalmağa qərar verib.
Levandovskinin agenti Pini Zahavi vasitəsilə bir neçə Səudiyyə Ərəbistanı klubu onun transfer vəziyyəti ilə maraqlansa da, təkliflər qəti şəkildə rədd edilib.
2024–2025 mövsümündə Levandovski Barselona üçün parlaq performans sərgiləyib. O, ümumilikdə 42 qola imza atıb, 3 məhsuldar ötürmə ilə yadda qalıb və komandasına La Liqa, İspaniya Kral Kuboku və Superkubok titulunu qazandırıb.
Levandovskinin bu mövsüm klub büdcəsinə təqribən 13 milyon avroya başa gələcəyi bildirilir. Lakin klub daxilində onun oyunlara təsir etmə gücü və Flikin planlarındakı rolu səbəbilə heyətdə saxlanılması məqsədəuyğun hesab edilir.
Hazırda həm Levandovski, həm də "Barselona" yeni mövsümə tam şəkildə köklənib. Komanda avqustun 16-da La Liqadakı ilk oyununda Malyorka ilə qarşılaşacaq.
