Bakı, AzerVoice, Fərid Mikayılov
Portuqaliyanın Porto klubu qapıçısı Diogo Kosta üçün Qalatasarayın təqdim etdiyi 20 milyon avroluq rəsmi təklifi geri çevirib.
AzerVoice xəbər verir ki, klub rəhbərliyi 25 yaşlı kapitanı satmaq fikrində deyil və oyunçunun müqaviləsindəki 75 milyon avroluq sərbəstqalma bəndinə istinad edir.
Porto rəhbərliyi Qalatasarayın təklifini oyunçunun real dəyərindən çox aşağı hesab edərək danışıqlar aparmaqdan imtina edib. Yeni baş məşqçi Françesko Fariolinin komandasında əsas fiqur olan Kostanın satılması gündəmdə deyil.
Qalatasaray Fernando Musleranın ayrılmasından sonra yeni qapıçı axtarışına başlayıb. Sarı-qırmızılıların birinci hədəfi Mançester Sitinin braziliyalı qapıçısı Ederson olsa da, bu transferlə bağlı hələlik razılıq əldə olunmayıb. Alternativ olaraq Costa üçün edilən təklif də uğursuz nəticələnib.
2019-cu ildən Portonun əsas heyətində çıxış edən Kosta, indiyədək 276 oyuna çıxıb və 110 dəfə qapısını toxunulmaz saxlayıb. Portuqaliya millisinin əsas qapıçısı olan Kosta bu yay Millətlər Liqasının qalibi olub və klubun son uğurlarında aparıcı rol oynayıb. O, həm yerli, həm də Avropa yarışlarında həlledici qurtarışları ilə diqqət çəkib.
