Türkiyənin BMT-dəki daimi nümayəndəsi Ahmet Yıldız Suriyanın kimyəvi silah irsinin aradan qaldırılması istiqamətində səylərini yüksək qiymətləndirib.
Bu barədə ArabAZ məlumat verir.
Yıldız BMT Təhlükəsizlik Şurasının Suriyanın kimyəvi silah məsələsinə həsr olunmuş iclasında çıxış edərək bu sahədə davamlı irəliləyişin Suriya ilə beynəlxalq ictimaiyyət arasında praktiki və koordinasiyalı əməkdaşlıq yolu ilə təmin edilə biləcəyini bildirib.
O, Kimyəvi Silahların Qadağan edilməsi Təşkilatının (OPCW) İcra Şurasının iyul ayında Suriyanın təşkilat çərçivəsində hüquq və imtiyazlarının bərpası ilə bağlı qərarını alqışlayıb. Həmçinin kimyəvi silah obyektlərinin yoxlanılması ilə bağlı əldə olunan son razılaşmaları müsbət qiymətləndirib.
Türkiyəli diplomat OPCW Texniki Katibliyinin Suriyaya göndərilməsini və 3-cü kateqoriyaya aid kimyəvi maddələrin məhv edilməsini yoxlamaq məqsədilə aparılan işləri dəstəkləyib.
Yıldız Suriyanın kimyəvi silahlardan tamamilə azad ölkəyə çevrilməsinin ümumi məqsəd olduğunu vurğulayıb və Türkiyənin bu istiqamətdə texniki və logistik imkanların gücləndirilməsinə dəstəyini davam etdirəcəyini bildirib.
