Suriya və Almaniyanın KfW İnkişaf Bankı ölkənin səhiyyə sektorunun bərpasına dəstək məqsədilə birgə layihələrin icrasının sürətləndirilməsi və maliyyələşmə ilə bağlı çətinliklərin aradan qaldırılması məsələlərini müzakirə edib.

ArabAZ xəbər verir ki,Suriyanın səhiyyə naziri Musab Əl-Əli Dəməşqdə KfW nümayəndə heyətinin rəhbəri Anna-Kristin Yanke ilə görüşüb. Tərəflər səhiyyə sahəsində həyata keçirilən birgə layihələrin maliyyələşdirilməsi mexanizmlərini, onların icrasına təsir edən problemləri və layihələrin sürətləndirilməsi üçün atılmalı addımları nəzərdən keçiriblər.

Musab Əl-Əli bildirib ki, layihələrin sürətləndirilməsi Suriyanın səhiyyə sisteminin bərpasına və tibbi xidmətlərin yaxşılaşdırılmasına kömək edəcək. Onun sözlərinə görə, bu proses ölkəyə qayıdan suriyalılar üçün əlverişli şəraitin yaradılmasına da töhfə verə bilər.

Nazir Almaniya ilə davamlı tərəfdaşlığın qurulmasının, təcrübə mübadiləsinin və beynəlxalq təcrübədən istifadə edilməsinin vacibliyini vurğulayıb. O, xüsusilə Almaniya və Yaponiyanın müharibədən sonrakı bərpa modellərindən yararlanmağın səhiyyə sektorunun gücləndirilməsinə və ölkənin bu sahədə öz imkanlarına daha çox arxalanmasına şərait yarada biləcəyini qeyd edib.

Anna-Kristin Yanke isə KfW-nin razılaşdırılmış layihələrin həyata keçirilməsinə sadiq qaldığını bildirib. O, bankın mövcud çətinliklərin həlli və layihələr üzrə işlərin sürətləndirilməsi istiqamətində Suriya tərəfi ilə əməkdaşlığa hazır olduğunu vurğulayıb.

KfW Almaniya hökumətinə məxsus inkişaf maliyyə institutudur. Bank dünyanın müxtəlif ölkələrində davamlı inkişaf, ətraf mühitin qorunması, iqlim dəyişikliyi və məşğulluğun artırılması ilə bağlı layihələri maliyyələşdirir.

Qeyd edək ki, avqust ayında Musab Əl-Əli Almaniyanın Dəməşqdəki səfirliyinin müvəqqəti işlər vəkili Markus Hikkenlə də görüşüb. Həmin görüşdə səhiyyə sahəsində Suriya-Almaniya əməkdaşlığının genişləndirilməsi, ölkənin bərpası və davamlı inkişafın dəstəklənməsi məsələləri müzakirə olunub.