BAKI, AzerVoice, Fərid Mikayılov
UFC rəsmi olaraq keçmiş yüngül çəki çempionu İslam Maxaçevin yarımorta çəki divizionunda titul qarşılaşmasına çıxacağını təsdiqləyib.
AzerVoice xəbər verir ki, rusiyalı döyüşçü kəmər uğrunda hazırkı çempion, avstraliyalı Cek Della Maddalena ilə üz-üzə gələcək.
İslam Maxaçev yüngül çəkidəki titulundan könüllü imtina edərək karyerasını yarımorta çəkidə davam etdirmək qərarı verib. Onun bu addımı diviziondakı qüvvələr balansını dəyişdirib və digər yüksək reytinqli iddiaçıların titul şansını ertələyib.
Hazırda yarımorta çəkidə əsas titul namizədləri amerikalı Şon Bredi və məğlubiyyətsiz qazax idmançı Şavkat Rəxmonov hesab olunur. Rəxmonov, 2024-cü ilin dekabrında İan Maçado Qerriyə qalib gələrək əsas pretendent statusunu qazanmışdı. Lakin aldığı zədə səbəbindən may ayında keçirilən UFC 315 turnirində iştirak edə bilməmişdi.
Bu səbəbdən titul döyüşü Belal Məhəmməd və Cek Della Maddalena arasında baş tutmuşdu. Məhz həmin qarşılaşmadan sonra Maddalena yeni çempion elan olunmuşdu.
UFC-nin Maxaçev – Maddalena döyüşünü rəsmiləşdirməsi divizionda vəziyyəti daha da gərginləşdirib.
