BAKI, AzerVoice, Səməd Əyyubov
“Liverpul” İngiltərə çempionatının üçüncü turunda öz meydanında “Arsenal” üzərində 1:0 hesablı qələbə qazanıb.
AzerVoice xəbər verir ki, qarşılaşma Enfild stadionunda keçirilib.
Oyunun yeganə qolunu 83-cü dəqiqədə Macarıstanlı yarımmüdafiəçi Dominik Soboslai cərimə zərbəsindən birbaşa vuraraq komandasına qələbə qazandırıb.
“Arsenal” artıq 13 ildir ki, İngiltərə çempionatında Enfilddə “Liverpul”u məğlub edə bilmir. London klubu son dəfə rəqibini səfərdə 2012-ci il sentyabrın 2-də 2:1 hesabı ilə üstələyib. Bununla belə, 2020-ci ildə “Arsenal” Liqa Kubokunun 1/8 finalında “Liverpul”u penaltilərlə mübarizədən kənarlaşdırmışdı. Həmin görüşdə əsas vaxt 0:0 hesabı ilə başa çatmış, penaltilər seriyasında isə London təmsilçisi 5:4 hesabı ilə qalib gəlmişdi.
“Liverpul” topladığı doqquz xalla turnir cədvəlinin vahid lideridir və çempionatda ilk üç oyunun hamısında qələbə qazanan yeganə komandadır. Altı xalı olan “Arsenal” isə üçüncü pillədə qərarlaşıb. Növbəti turda “Liverpul” sentyabrın 14-də səfərdə “Börnli” ilə qarşılaşacaq, “Arsenal” isə bir gün əvvəl “Nottingem Forest”i qəbul edəcək.
