Azərbaycanın daha 2 boksçusu Avropa çempionatında yarımfinala vəsiqə qazanıb

Almaniyanın Keinbaum şəhərində yeniyetmə boksçular arasında U-17 Avropa çempionatında 1/4 final mərhələsi başa çatıb. Yarışın son günündə Azərbaycan millisinin nümayəndələri uğurlu çıxışları ilə yadda qalıblar. Belə ki, daha iki azərbaycanlı boksçu yarımfinala yüksələrək medal uğrunda mübarizəni davam etdirmək hüququ qazanıb. Onların bu nəticəsi millimizin turnirdəki ümumi uğuruna mühüm töhfə kimi qiymətləndirilir.

14 Dekabr 2025 22:12

BAKI, AzerVoice

Almaniyanın Keinbaum şəhərində yeniyetmə boksçular arasında U-17 Avropa çempionatında 1/4 final mərhələsinə yekun vurulub.

AzerVoice-un məlumatına görə, mərhələnin son günündə Azərbaycan millisinin daha 2 idmançısı yarımfinala vəsiqəni təmin edib.

Gülər Hüseynova (48 kiloqram) Maria Spennato (İtaliya) ilə döyüşüb. Boksçumuz rəqibinə ikinci raundda tam üstünlüklə qalib gəlib. O, yarımfinalda Serana Mali (İngiltərə) ilə üz-üzə gələcək.

Şahin Aslanov (60 kiloqram) da 1/4 final döyüşünü öz xeyrinə bitirib. O, bu dəfə İvaylo Kolevi (Bolqarıstan) məğlub edib – 4:1 (30:27, 30:27, 30:27, 30:27, 28:29). Boksçunuzun finala gedən yolda rəqibi Ceyson Maher (İrlandiya) olacaq.

Beləliklə, yarımfinalda iştiraklarını rəsmiləşdirməklə özləri üçün bürünc medalı təmin edən boksçularımızın sayı 4-ə yüksəlib. Daha öncə Qardaş Rəhimovla (46 kiloqram) Şükar Əliyev (75 kiloqram) də bu hüquqa yiyələniblər.

Qeyd edək ki, yarımfinal döyüşləri dekabrın 15-də olacaq.