BAKI,VOA, Fərid Mikayılov
Fransalı mütəxəssis Zinəddin Zidanın Real Madridə qayıdışı baş tutmayacaq.
VOA xəbər verir ki, İspaniya mətbuatının yaydığı məlumata görə, Zinəddin Zidan klub prezidenti Florentino Peres ilə keçirilən danışıqlarda “Santyaqo Bernabeu”ya üçüncü dəfə qayıtmaq təklifini qəbul etməyib.
Bildirilir ki, klub rəhbərliyi Zidanı Xabi Alonso əvəz etmək üçün əsas namizəd kimi görüb. Lakin fransalı məşqçi artıq Didye Deşam sonrası Fransa millisinin baş məşqçisi olmaq planını seçdiyi üçün bu təklifi rədd edib.
Hazırda komandaya rəhbərlik edən Alvaro Arbeloa dövründə nəticələr gözləntiləri doğrultmayıb. La Liqa çempionatında Real Madrid lider Barselona klubundan 12 xal geri qalır və titul uğrunda mübarizəni itirmək təhlükəsi ilə üz-üzədir.
Komandanın UEFA Çempionlar Liqası kampaniyası da uğursuz olub – Madrid təmsilçisi 1/4 final mərhələsində Bayern Münhen klubuna uduzaraq turnirlə vidalaşıb. Bu isə ardıcıl ikinci mövsüm titulsuz qalmaq riskini artırıb.
Media məlumatlarına görə, klub daxilində gərginlik pik həddə çatıb. Soyunub-geyinmə otağında vəziyyətin “partlayış həddində” olduğu bildirilir və Kilian Mbappe, Vinisius Junior və Cud Bellinqem kimi ulduz oyunçular arasında fikir ayrılıqları olduğu iddia olunur.
Qeyd edək ki, Zidan daha əvvəl həm futbolçu, həm də baş məşqçi kimi Real Madriddə fəaliyyət göstərib və onun rəhbərliyi altında klub ardıcıl üç dəfə Çempionlar Liqasının qalibi olub.
Hazırda klub rəhbərliyi yeni baş məşqçi axtarışlarını davam etdirir. Namizədlər arasında Joze Mourinyo, Yurgen Klopp və Massimiliano Alleqri kimi tanınmış mütəxəssislərin adları çəkilir.
