Qətər Hər Kəs Üçün İdman Federasiyası cəmiyyətin müxtəlif təbəqələrinin və bütün yaş qruplarının geniş iştirakı ilə keçirilən "İdman Yayı 2026" proqramının uğurunu alqışlayıb. Tədbirlər parklar, idman klubları, gənclər və ticarət mərkəzləri, məhəllə meydançaları, məktəblər və müxtəlif idman obyektləri də daxil olmaqla 65-dən çox mekanda təşkil olunub.
İdman və Gənclər nazirinin məsləhətçisi, Qətər Hər Kəs Üçün İdman Federasiyasının sədri Əbdülrəhman bin Müslüm Əd-Dosari bildirib ki, proqramın qazandığı uğur əhalinin idmanla məşğul olmağa artan marağında öz əksini tapır. 65-dən çox fərqli mekanda təşkil edilən tədbirlərdə iştirakçıların sayı 36 100 nəfəri keçib.
O vurğulayıb ki, bu kütləvi iştirak cəmiyyətin bütün təbəqələrinə çıxış əldə etməyin mümkünlüyünü, idmanı gündəlik həyatın bir hissəsinə çevirərək uşaqlarda idman vərdişlərini aşılamağın və "Qətər Milli Vizyonu 2030" məqsədlərinə doğru irəliləməyin əhəmiyyətini bir daha sübut edir.
Əd-Dosari fəaliyyət dairəsinin idman klubları, gənclər mərkəzləri, idman zalları, parklar və məktəblər arasında bölünməsi sayəsində cəmiyyətin ən geniş təbəqələrinə çatdıqlarını və bunun Federasiyanın planlarının uğurundan xəbər verdiyini bildirib.
O, İdman və Gənclər Nazirliyinin davamlı dəstəyinin, eləcə də 50-dən çox tərəfdaş qurum və müəssisə ilə səmərəli əməkdaşlığın uğurun əsas amillərindən biri olduğunu, inteqrasiya olunmuş idman mühitinin yaradılmasına və proqramın yüksək səviyyədə keçirilməsinə kömək etdiyini vurğulayıb.
Qətər Hər Kəs Üçün İdman Federasiyasının icraçı direktoru Abdulla Əd-Dosari isə bildirib ki, "İdman Yayı 2026" proqramının əsas məqsədi İdman və Gənclər Nazirliyinin, Federasiyanın və digər tərəfdaş qurumların birgə səyi ilə yay tətilini fiziki aktivlik, sağlamlığın möhkəmləndirilməsi, bacarıqların artırılması və asudə vaxtın səmərəli dəyərləndirilməsi fürsətinə çevirmək olub.
O qeyd edib ki, proqram çərçivəsində tətbiq edilən tədbirlərin rəngarəngliyi, o cümlədən Lusail İdman Zalında keçirilən uşaq düşərgəsi, ticarət mərkəzlərindəki addım yarışları, Təhsil Şəhərciyində qadınlar üçün təşkil edilən tədbirlər, Muay-Tay və üzgüçülük məşqləri kütləvi iştirakın təmin edilməsində böyük rol oynayıb.
