Əlcəzair qadın milli komandasının kapitanı və İngiltərənin "Bristol Siti" klubunun futbolçusu Marin Dafeur ölkəsinin 2027-ci ildə Braziliyada keçiriləcək Qadınlararası Dünya Çempionatına tarixi vəsiqə qazanmasından danışıb. FİFA-nın rəsmi saytına müsahibə verən 31 yaşlı futbolçu komandanın mundialda güclü çıxış etmək üçün real potensiala sahib olduğunu vurğulayıb.
Əlcəzair millisi Qadınlararası Afrika Millətlər Kubokunun 1/4 final mərhələsində Kasablankada Kot-d'İvuara qarşı oyunda geridönüş edərək 2:1 hesabı ilə qalib gəlib və tarixində ilk dəfə dünya çempionatına vəsiqəni təmin edib. Turnirin ən parlaq oyunçularından olan Dafeur açılış matçında Seneqala qarşı penaltidən (2:0), ardınca isə Keniyaya qarşı cərimə zərbəsindən möhtəşəm qolla fərqlənib (2:0).
Keniyaya vurduğu qol barədə danışan kapitan baş məşqçinin ona topa güclü zərbə vurmağı tapşırdığını, onun da bu göstərişə əməl edərək karyerasının ən gözəl qoluna imza atdığını qeyd edib. Əlcəzair millisi bürünc medal uğrunda görüşdə Mərakeşi ("Atlas şirləri") əsas vaxtı 1:1 bitən oyunda penaltilər seriyasında 3:2 hesabı ilə məğlub edərək turnirin üçüncüsü olub.
Fransa millisindən Əlcəzair kapitanlığına
Marin Dafeur maraqlı beynəlxalq karyera yoluna malikdir. O, 2014-cü ildə Fransanın 20 yaşlılardan ibarət (U-20) yığması ilə dünya üçüncüsü olub və əsas yığmaya namizədlərdən sayılıb. Lakin dizindəki ikiqat çarpaz bağ zədəsi onu uzun müddət yaşıl meydanlardan uzaq salıb. Üç il əvvəl idman vətəndaşlığını dəyişərək atasının vətəni olan Əlcəzair yığmasını seçən futbolçu baş məşqçi Fərid Benşeyxanın rəhbərliyi altında komandanın əsas fiquruna çevrilib.
Braziliyadakı mundial heyətinə düşməyin əsas hədəfi olduğunu deyən Dafeur bildirib ki, komandada təcrübəli və gənc futbolçuların əla vəhdəti var: "Mundiala hazırlaşmaq üçün bir ildən az vaxtımız var və bu müddətdən maksimum yararlanmalıyıq".
