Əlcəzairin şərq sahillərinin incisi sayılan Cicel vilayəti dəhşətli meşə yanğınları nəticəsində külə dönüb. Hər yay minlərlə turisti qəbul edən yaşıl dağlar yanıb, sıx tüstü dəniz sahillərini bürüyərək bölgədə dərin kədər və şok yaradıb. Cicel şəhərinin qərbində yerləşən "Cümə Bəni Həbibi" qəsəbəsində fəlakət qurbanı olan 39 nəfər kütləvi şəkildə "Dərul-Bəqa" qəbiristanlığında dəfn edilib. Dəfn mərasimində yerli sakinlərlə yanaşı, Prezident Əbdülməcid Təbbunun tapşırığı ilə Baş nazir Seyfi Qərib və yüksəksəviyyəli hökumət nümayəndə heyəti iştirak edib.

Əlcəzairdə meşə yanğınları 73 can aldı

Ekoloji və humanitar fəlakət ən çox Cicel vilayətini vurub; alovlar bölgənin meşə örtüyünün təxminən 80 faizini məhv edib. Küləyin sürətinin saatda 80–100 km-ə çatması və havanın temperaturunun 50 dərəcəyə yaxınlaşması qonşu vilayətlərə də ciddi ziyan vurub. Bicayə və Tizi-Vuzu vilayətlərində insan tələfatı qeydə alınıb, Milə vilayətində isə 300 hektardan çox meyvə bağı, arı pətəkləri və kolluq yanıb. Skikda vilayətində 27 bələdiyyə üzrə 57 yanğın ocağı aşkarlanıb, Qalmə vilayətində onlarla ailə təxliyə edilib. Təbəssə, Sətif və Qəlizanda da yanğın ocaqları qeydə alınıb.

Ailələri yox edən alovlar

Yerli ilkin məlumatlara görə, təkcə Bəni Həbibi bələdiyyəsində 73 qurban qeydə alınıb və itkin düşənlərin axtarışı davam etdiyi üçün bu rəqəmin artacağı gözlənilir. Alman Mətbuat Agentliyinə (DPA) danışan şahidlər qonşu yüksəkliklərdə eyni ailədən 21 nəfərin alovun içində qalaraq həyatını itirdiyini, bütöv ailələrin məhv olduğunu və cəsədlərin tanınmaz dərəcədə yandığını bildiriblər.

Cicel vilayətinin Tisbilan, Bürc ət-Təhr, Övlad Əskər və Sidi Məruf kimi ərazilərində sakinlər "dəhşət günü" yaşayıblar. Güclü külək səbəbindən alov qəfil yayılaraq qaçmağa və ya mal-qarasını xilas etməyə çalışan insanları mühasirəyə alıb. Milə və Qalmə vilayətlərində onlarla ailə avtobuslarla məktəblərə, gənclər düşərgələrinə və məscidlərə köçürülüb.

Fransanın Əlcəzairdəki Cinayətləri: Müstəmləkəçilik, Soyqırım və Qətliamlar

Rəsmi statistika və beynəlxalq həmrəylik

Daxili İşlər Nazirliyinin ilkin rəsmi açıqlamasına əsasən, 12 nəfər həyatını itirib (5 nəfər Cicel, 4 nəfər Bicayə, 3 nəfər Tizi-Vuzuda), 54 nəfər isə müxtəlif dərəcəli yanıq xəsarətləri alıb (onlardan 6-nın vəziyyəti ağırdır və reanimasiyadadır).

Prezident Əbdülməcid Təbbun ölkədə 3 günlük milli matəm elan edib, dövlət bayraqları endirilib və bütün idman və ictimai tədbirlər təxirə salınıb. Qətər, Səudiyyə Ərəbistanı, BƏƏ, Küveyt, Misir və Suriya kimi bir sıra ərəb ölkələri Əlcəzairə başsağlığı və həmrəylik mesajları göndərib.

Ekoloji zərər və söndürmə tədbirləri

Fəlakət əsas nəqliyyat yollarının, xüsusən 77 nömrəli milli yolun bağlanmasına səbəb olub. Mülki Müdafiə qüvvələri qeydə alınan 114 yanğın ocağından 103-nün söndürüldüyünü açıqlayıb.

Baş nazir Seyfi Qərib güclü küləyin əvvəlcə aviasiya ilə müdaxiləni çətinləşdirdiyini, havanın sabitləşməsindən sonra helikopterlərin yenidən cəlb edildiyini bildirib. O, dövlətin zərərçəkənlərə tam dəstək verəcəyini və yanan meşələrin yenidən bərpa ediləcəyini vurğulayıb. Milli Jandarm qüvvələri yanğınların səbəbini və mümkün təxribat izlərini araşdırmağa başlayıb. Hazırda Cicel (4), Təbəssə (2), Sətif (2), Skikda (1), Milə (1) və Qəlizanda (1) qalan 11 ocağın söndürülməsi və nəzarətdə saxlanılması işləri davam edir.