Səudiyyə Pro Liqasının altıncı turu bazar ertəsi keçiriləcək iki qarşılaşma ilə start götürür. Riyaddakı "Kingdom Arena"da vahid lider "Əl-Hilal" turnir cədvəlində yuxarı pillələrə can atan "Neom" klubunu qəbul edəcək. Dəmmamda isə ötən tur ağır məğlubiyyətlərlə üzləşən "Əl-Xəlic" və "Ər-Riyad" komandaları turnir cədvəlindəki vəziyyətlərini düzəltmək üçün meydana çıxacaqlar.
ArabAZ xəbər verir ki, İtalyan mütəxəssis Simone İnzaqinin rəhbərliyi altında mövsümə parlaq başlayan "Əl-Hilal" beş oyundan maksimum – 15 xal toplayaraq vahid liderlik statusunu qoruyur. Ötən tur "Əş-Şəbab" üzərində qazanılan 2:0 hesablı qələbə və ən yaxın izləyicisi "Ən-Nəsr"in səfərdə "əl-İttihad"la matçda xal itirməsi "Əl-Hilal"ın mövqeyini daha da möhkəmləndirib. Son iki mövsümdür çempionluqdan uzaq qalan klub bu qarşılaşmada ardıcıl altıncı qələbəsini hədəfləyir. Komandanın hücum xəttində ingilis ulduz Olli Uotkins, braziliyalı Qabriel Martinelli və niderlandlı Krisensio Sammervill kimi güclü adlar yer alır. Lakin müdafiə xəttində itkilər davam edir; fransalı Teo Hernandes və Əli Lacami zədə səbəbindən hələ də yaşıl meydanlardan kənardadır.
Qonaq "Neom" isə iki ardıcıl məğlubiyyətdən sonra ötən tur "Əl-Xəlic"i 3:0 hesabı ilə darmadağın edərək xallarını doqquza çatdırıb və yeddinci pilləyə yüksəlib. "Neom"un fransalı baş məşqçisi Kristof Qaltye komandasının meydana qorxu ilə deyil, qələbə əzmi ilə çıxacağını vurğulayıb: "Əl-Hilal" Səudiyyə Ərəbistanının və Asiyanın ən güclü komandalarındandır, beş oyuna 17 qol vurublar və heyətlərini İngiltərə Premyer Liqasından oyunçularla gücləndiriblər. Onlara hörmət etmək lazımdır, lakin qorxmaq olmaz. Riyada qələbə əzmi ilə yollanırıq". Qonaqlarda Səid Benrahma, Əbdüləziz əl-Osman və yunanıstanlı Giorqos Masuras zədə səbəbindən oynamayacaq; argentinalı Valentin Vadanın meydana ilk dəqiqələrdən çıxması isə hələ də sual altındadır.
Günün digər oyununda - Dəmmamda isə Portuqaliyalı Joze Qomeşin baş məşqçisi olduğu "Əl-Xəlic" mövsümdə ilk qələbəsini axtarır. Son iki turda "Əl-Hilal"a 1:5, "Neom"a isə 0:3 hesabı ilə məğlub olaraq qapısında səkkiz qol görən komanda 3 xalla 16-cı yerdə qərarlaşıb. Braziliyalı Maurisio Dulakın çalışdırdığı "Ər-Riyad" isə ötən tur "Əl-Əhli"yə 0:5 hesabı ilə uduzmasının əvəzini çıxmaq niyyətindədir; 4 xalla 12-ci yerdə olan paytaxt təmsilçisi qələbə qazanaraq təhlükəli zonadan uzaqlaşmaq istəyir.
