Bakı, AzerVoice
Ulyanovsk (Rusiya) - Bakı (Azərbaycan) - Astara (İran) marşrutu üzrə ilk yük qatarı bu ay yola düşəcək.
AzerVoice xəbər verir ki, bu barədə Ulyanovsk vilayətinin qubernatoru Aleksey Russkix bildirib.
"Ulyanovsk-Bakı-Astara yük bloku qatarının ilk heyəti "Orta Volqa-Xəzər-Fars körfəzi" dəhlizi çərçivəsində sentyabrın sonunda yola düşəcək. Qatar azı 70 müxtəlif modifikasiyalı vaqon, o cümlədən qapalı çənlər, bunker tipli vaqonlardan ibarətdir. Hər bir qatar 3,5 min ton müxtəlif məhsulların - aqrar-sənaye kompleksinin və ağac emalının məhsulları, habelə sənaye mallarının daşınması üçün nəzərdə tutulub", - deyə Russkix bildirib.
Russkix əlavə edib ki, qatarın Azərbaycan, İran və qonşu ölkələrdə istehsal olunan mallarla yenidən yüklənməsi məsələsinə baxılır.
“Qeyd etmək istərdim ki, ixrac qatarı Sovet İttifaqı dövründən bu istiqamətdə hərəkət edən ilk qatar olacaq”, - deyə Russkix bildirib.
