BAKI, AzerVoice
London ICE birjasında cari ilin sentyabr ayı üçün tədarükü nəzərdə tutulan "Brent" markalı neftin fyuçerslərinin qiyməti artıb.
AzerVoice xəbər verir ki, bu barədə ticarət məlumatları göstərir.
Belə ki, Bakı vaxtı ilə saat 09:11-də "Brent" markalı neftin fyuçerslərinin qiyməti 0,18 dollar (0,26%) artaraq bir barel üçün 70,54 dollara çatıb. Keçən cümə bu kontraktlar 1,72 dollar (2,5%) bahalaşaraq bir barel üçün 70,36 dollar olmuşdu.
Nyu-York Əmtəə Birjasının (NYMEX) elektron ticarət platformasında avqust ayı üzrə WTI markalı neftin fyuçersləri də 0,18 dollar (0,26%) artaraq bir barel üçün 68,63 dollara yüksəlib. Əvvəlki sessiyanın nəticələrinə görə, bu kontraktlar 1,88 dollar (2,8%) bahalaşaraq 68,45 dollara çatmışdı.
Ötən həftənin yekununda "Brent" markalı neftin qiyməti 3%, WTI markalı neftin qiyməti isə 2,2% artıb.
Həftənin sonunda neftin qiymət artımına Beynəlxalq Enerji Agentliyinin aylıq hesabatı dəstək verib. Hesabatda neft emalı zavodlarının yanacağa olan yüksək tələbatı qeyd olunub. Bununla yanaşı, agentlik 2025-ci il üzrə qlobal neft tələbatının artım proqnozunu sutkada 704 min barelə endirib, neft təklifinin artım proqnozunu isə sutkada 2,1 milyon barelə qədər (300 min b/s artım) yüksəldib.
