BAKI,VOA,Yusif Şərifzadə
Misirin xarici işlər naziri Bədr Əbdülati ilə İranın xarici işlər naziri Abbas Əraqçi arasında telefon danışığı olub. Tərəflər bölgədəki ümumi vəziyyəti, gərginliyin azaldılması üçün aparılan diplomatik səyləri və ABŞ–İran anlaşma memorandumunun icrasının mümkün bərpasını müzakirə ediblər.
VOA xəbər verir ki, Misir Xarici İşlər Nazirliyinin yaydığı bəyanata əsasən, Bədr Əbdülati və Abbas Əraqçi telefon danışığı zamanı bölgədə gərginliyin azaldılması üçün əlverişli şəraitin yaradılmasına yönəlmiş davam edən səyləri nəzərdən keçiriblər.
Tərəflər diplomatik prosesə qayıdış imkanlarını da müzakirə ediblər. Bu çərçivədə Oman ilə İran arasında aparılan danışıqların gələcək istiqamətləri diqqət mərkəzində olub.
Telefon danışığında ABŞ ilə İran arasında əldə edilmiş anlaşma memorandumunun icrasının yenidən başlanması məsələsi də nəzərdən keçirilib.
Misir Xarici İşlər Nazirliyinin məlumatına görə, diplomatik səylərin son məqsədi müxtəlif tərəflərin narahatlıqlarını nəzərə alan, eyni zamanda bölgədə təhlükəsizlik və sabitliyi gücləndirən hərtərəfli və davamlı razılaşmanın əldə edilməsidir.
Bədr Əbdülati mövcud gərginliyin azaldılması üçün davam edən diplomatik təşəbbüslərin və təmasların daha da intensivləşdirilməsinin vacibliyini vurğulayıb.
Misirin xarici işlər naziri tərəflər arasında dinc anlaşmaların əldə edilməsinin bölgədə təhlükəsizliyin və sabitliyin bərpasına kömək edə biləcəyini bildirib.
Qahirənin açıqlaması bölgədə hərbi gərginliyin azaldılması və ABŞ ilə İran arasında diplomatik prosesin yenidən canlandırılması istiqamətində müxtəlif ölkələrin vasitəçilik səylərinin davam etdiyi bir vaxta təsadüf edir.
