Bakı,
AzerVoice
Arıqlama inyeksiyalarının ürək əzələlərini kiçildə biləcəyi müəyyən
edilib. Elm adamları bu təsirin kilo itkisindən asılı olmayaraq baş
verdiyini düşünürlər.
Şəkər xəstəliyinin müalicəsi və arıqlamaq üçün istifadə edilən “Ozempic” və “Wegovy” dərmanları xüsusilə Qərb ölkələrində populyarlıq qazanıb. GLP-1 agonist sinfinə aid bu inyeksiyalar ürək və böyrək sağlamlığına müsbət təsir göstərə bilsə də, bəzi ekspertlər uzunmüddətli təsirlərin arzuolunmaz ola biləcəyini qeyd edirlər.
Kanadanın Alberta Universitetində aparılan araşdırmada “Ozempic”in aktiv maddəsi olan semaqlutid siçanlar və insan hüceyrələri üzərində sınaqdan keçirilib. Tədqiqat nəticələri The Lancet jurnalında dərc edilib.
Tədqiqat zamanı diabet və ürək problemi olmayan arıq və kök siçanlara 21 gün ərzində semaqlutid yeridilib. Bir qrup siçan nəzarət üçün müalicəsiz saxlanılıb. Üç həftə sonra kök siçanlar bədən çəkisinin 30%-ni, yağ kütləsinin isə 65%-ni itirdi. Arıq siçanlarda skelet əzələlərinin 8%-ə qədər azalma baş verdi.
Ürək fəaliyyətində dəyişiklik müşahidə edilməsə də, dərman qəbul edən qruplarda ürək kütləsində və ürək əzələ hüceyrələrinin ölçüsündə azalma qeydə alınıb. İnsan ürək hüceyrələri üzərində aparılan laboratoriya sınaqlarında da semaqlutid əzələlərin kiçilməsinə səbəb olub. Lakin atrofiya markerlərində heç bir dəyişiklik müşahidə edilməyib, buna görə də dərmanın ürək əzələlərini kiçiltməsinin dəqiq sübutu yoxdur.
Əgər bu tapıntılar insanlar üçün də təsdiq edilərsə, ürək xəstəlikləri və atrofiya riski olan şəxslər üçün dərmanların istifadəsi ciddi təhlükə yarada bilər. Tədqiqatçılar “Ozempic” kimi dərmanların əzələ itkisinə səbəb olub-olmadığını öyrənmək üçün daha çox araşdırmanın vacib olduğunu vurğulayırlar.
Tədqiqat müəllifi Jason Dyck bildirib ki, yan təsirləri diqqətlə izləmək vacibdir. Alberta Universitetinin qidalanma mütəxəssisi Carla Prado isə dərmanların qidalanma və idmanın əvəzi olmadığını qeyd edərək insanların bu vasitələrdən yalnız dərman kimi istifadə etməməsi lazım olduğunu vurğulayıb.
Nəticə etibarilə, arıqlama inyeksiyalarının potensial yan təsirləri diqqətlə araşdırılmalı və istifadəsinə ehtiyatla yanaşılmalıdır.
