BAKI, AzerVoice, Fərid Mikayılov
Ümumdünya Səhiyyə Təşkilatı (ÜST) alkoqolun xərçəngin yaranmasında aparıcı risk amillərindən biri olduğunu bildirib.
Beynəlxalq Xərçəng Araşdırma Agentliyinin (IARC) yeni hesabatına görə, dünyada ən yüksək alkoqol istehlakına malik region olan Avropa İttifaqında yalnız 2020-ci ildə 111 mindən çox yeni xərçəng hadisəsi alkoqol istifadəsi ilə əlaqələndirilib.
ÜST-ün məlumatına əsasən, dünya üzrə alkoqolla əlaqəli xərçəng hallarının sayı 741 minə çatıb, bu xəstəliklərdən təsirlənənlərin təxminən 70 faizi kişilərdir.
ÜST-ün hesablamalarına görə, 2018-ci ildə alkoqol səbəbindən baş verən erkən ölümlərin iqtisadi dəyəri 4,58 milyard avro təşkil edib.
Alimlərə görə, alkoqolun orqanizmə təsiri hormon səviyyələrinin pozulması, bağırsaq mikroflorasının dəyişməsi, oksidativ stress və etanoldakı asetaldehid maddəsinin DNT-yə zərər verməsi ilə izah olunur.
Hesabatda qeyd edilir ki, alkoqolla əlaqəli xərçəng hallarının çoxu “riskli” içki qəbuluna (gündə 2–6 içki) və “ağır” içki istehlakına (gündə 6-dan çox içki) bağlıdır.
Lakin hətta “orta səviyyədə içki qəbul edənlər” (gündə 2 içkidən az) arasında belə 2020-ci ildə 100 mindən çox yeni xərçəng hadisəsi qeydə alınıb.
Araşdırma göstərir ki, dövlətlər səviyyəsində sərt alkoqol siyasəti xərçəng hallarının qarşısını almaqda mühüm rol oynaya bilər.
