BAKI,VOA, Fərid Mikayılov

İranda xarici media qurumu ilə əməkdaşlıq etdikləri iddia olunan bir qrup jurnalistin saxlanıldığı bildirilib. Ölkə rəsmiləri onların İsraillə əlaqəli olmaqda şübhəli bilinən televiziya kanalı ilə əməkdaşlıq etdiyini iddia edir.

VOA xəbər verir ki, İran hakimiyyəti İsraillə əlaqədə olmaqda ittiham etdiyi peyk xəbər kanalı “Iran International” üçün çalışdıqları iddia edilən 18 nəfəri saxlayıb.

Məlumata görə, İranın Kəşfiyyat Nazirliyi saxlanılan şəxslərin ABŞ və İsrailin hücumları nəticəsində zərər görən ərazilərin, eləcə də təcili yardım və xilasetmə qruplarının yerləşdiyi nöqtələrin fotoşəkillərini sözügedən kanala göndərdiyini bildirib.

Həmçinin xəbərdə ən azı daha 21 nəfərin hüquqi araşdırma ilə üzləşə biləcəyi qeyd olunub.

Bundan əvvəl İran rəsmiləri ölkənin düşmənləri ilə məlumat paylaşmaq ittihamı ilə azı 500 nəfərin saxlanıldığını açıqlamışdı.