BAKI, VOA, Orxan Qədirzadə
İran ordusu ölkənin cənubunda ABŞ-a məxsus olduğu iddia edilən F-15 tipli qırıcı təyyarəni hava hücumundan müdafiə sistemləri ilə vurduğunu açıqlayıb. Məlumata görə, vurulan təyyarə Hörmüz adası yaxınlığında dənizə düşüb.
VOA xəbər verir ki, İran dövlət televiziyası Hava Hücumundan Müdafiə Birgə Qərargahının bəyanatına istinadən xəbər yayıb. Bildirilib ki, bir neçə saat əvvəl düşmənə məxsus F-15 qırıcısı ölkənin cənub sərhədlərində hədəfə alınıb. Ordu qüvvələrinin "yer-hava" tipli raket sistemləri ilə vurduğu təyyarənin Bəsrə körfəzindəki Hörmüz adası yaxınlığında "suya batdığı" qeyd edilib. Hazırda təyyarənin taleyi və qalıqları ilə bağlı araşdırma başladılıb.
Hələlik nə ABŞ, nə də İsrail tərəfi F-15 təyyarəsinin vurulması ilə bağlı iddialara rəsmi reaksiya verməyib. Lakin bu hadisə son günlərdə baş verən silsilə itkilərin davamı kimi qiymətləndirilir. Belə ki, İran tərəfi martın 19-da ABŞ-a məxsus F-35, ötən gün isə İsrailin F-16 qırıcısını vurduğunu elan edib.
Xatırladaq ki, ABŞ ordusu hədəf alınan F-35-in bölgə ölkələrindən birindəki bazaya "sərt eniş" etdiyini iddia edərək vurulma faktını qismən təkzib edib. İsrail tərəfi isə F-16 təyyarəsinin İran tərəfindən nişan alındığını, lakin heç bir zərər görmədiyini bildirib. İran tərəfi isə hər iki halda təyyarələrin ciddi xəsarət aldığını və ya sıradan çıxdığını müdafiə edib.
Hazırda bölgədə quru əməliyyatının hər an başlaya biləcəyi ehtimalı ilə əlaqədar İran ordusu tam döyüş hazırlığı vəziyyətinə gətirilib.
