BAKI,VOA, Orxan Qədirzadə
ABŞ Prezidenti Donald Trampın İranın infrastrukturunu tamamilə məhv edəcəkləri barədə xəbərdarlığından qısa müddət sonra, İranın Elburz əyalətində yerləşən strateji B1 körpüsü hava zərbələri ilə dağıdılıb.
VOA xəbər verir ki, Kərəc şəhərində yerləşən və "Yaxın Şərqin ən hündür körpüsü" kimi tanınan B1 körpüsü iki ardıcıl hava hücumuna məruz qalıb.
Birinci zərbə nəticəsində körpünün orta hissəsi tamamilə uçub. İlkin məlumatlara görə, hücum zamanı 2 nəfər həyatını itirib, çox sayda insan yaralanıb. İkinci zərbənin əraziyə xilasetmə qrupları gəldiyi zaman endirildiyi bildirilir.
Hücum təkcə nəqliyyat infrastrukturuna deyil, həm də enerji sisteminə ciddi ziyan vurub. Elburz Elektrik Paylayıcı Şirkətinin məlumatına görə, strateji Çalus yolu xətti üzərindəki elektrik kabellərinin zədələnməsi nəticəsində ölkənin şimal bölgələrində genişmiqyaslı kəsintilər yaranıb. Hazırda bərpa qrupları ərazidə işləyir, lakin vəziyyətin gərgin olduğu qeyd edilir.
İranın Xarici İşlər naziri Abbas Araqçi hücumu "düşmənin mənəvi çöküşünün göstəricisi" adlandırıb. O, X sosial şəbəkəsində etdiyi paylaşımda Trampın "daş dövrü" bəyanatına eyham vuraraq bildirib:
"Mülki infrastrukturu, hətta hələ tamamlanmamış körpüləri vurmaq iranlıları təslim edə bilməz. Daş dövrü ilə bu gün arasında bir fərq var: O vaxtlar Yaxın Şərqdə neft və qaz yox idi. Tramp zamanı geri çevirmək istədiyinə əmindirmi?"
ABŞ Prezidenti Donald Tramp son açıqlamasında İranın hava hücumundan müdafiə imkanlarının sıradan çıxarıldığını iddia edib. "Növbəti 2-3 həftə ərzində onları daha sərt vuracağıq. Hələlik neft infrastrukturuna toxunmamışıq, amma bu da masadadır", - deyə o qeyd edib.
