ABŞ-də İran müharibəsinin enerji xərclərini artırması fonunda Əmək Günü həftəsonunda benzin qiymətlərinin rekord səviyyəyə yüksələcəyi gözlənilir. Analitiklər bir qallon üçün 4 dollar həddini amerikalı istehlakçılar üçün kritik qiymət səviyyəsi hesab edirlər.

ArabAZ xəbər verir ki, “GasBuddy”nin proqnozuna görə, bazar ertəsi Əmək Günündə ABŞ-də benzinin orta qiyməti bir qallon üçün 4,03 dollara çata bilər.

Bu göstərici 2012-ci ildə qeydə alınmış 3,83 dollarlıq əvvəlki rekorddan yüksəkdir.

“GasBuddy”nin məlumatına görə, cümə axşamı ABŞ-də benzinin orta qiyməti təxminən 4,13 dollar olub ki, bu da ötən ilin göstəricisindən təxminən 1 dollar çoxdur.

Əmək Günü ABŞ-də əmək hərəkatına həsr olunan rəsmi federal bayramdır və uzun həftəsonu ərzində ölkə daxilində səyahətlərin artması yanacağa tələbatı yüksəldir.

Analitiklər “Reuters”ə bildiriblər ki, bir qallon üçün 4 dollar həddi ABŞ istehlakçıları üçün ciddi xərc yükü yaradan səviyyədir.

ABŞ ilə İran arasında münaqişənin yeddinci ayına daxil olması fonunda enerji xərclərinin artması Donald Tramp administrasiyasının əsas iqtisadi narahatlıqlarından birinə çevrilib.

Yüksək yanacaq qiymətləri noyabr ayında keçiriləcək aralıq seçkilər ərəfəsində administrasiya üçün əlavə siyasi təzyiq yaradır.