BAKI,VOA, Orxan Qədirzadə

"Axios" xəbər portalı mənbələrə istinadən xəbər verir ki, ABŞ Hərbi Dəniz Qüvvələrinə məxsus döyüş gəmiləri bu şənbə günü strateji əhəmiyyətli Hürmüz boğazından keçib. Bu addım regionda gərginliyin azaldılması və ticarət yollarının təhlükəsizliyi istiqamətində mühüm hərbi-siyasi mesaj kimi qiymətləndirilir.

VOA xəbər verir ki, mənbələrin məlumatına görə, ABŞ döyüş gəmiləri əvvəlcə Hörmüz boğazından keçərək Fars körfəzinə daxil olub, daha sonra isə eyni marşrutla geri dönərək Ərəb dənizinə çıxıblar. Bu əməliyyatın bir neçə əsas məqsədi olduğu vurğulanır:

Gəmilərin keçidi bölgədə hərəkət edən ticarət və neft gəmilərinin heyətlərində naviqasiya təhlükəsizliyinə dair inamı bərpa etmək və gücləndirmək məqsədi daşıyıb.

Əməliyyat beynəlxalq sularda naviqasiya azadlığı prinsipinə (Freedom of Navigation) söykənərək həyata keçirilib.

Bu manevr ABŞ-ın regiondakı iştirakını və qlobal enerji təhlükəsizliyinə verdiyi önəmi nümayiş etdirir.

İslamabad danışıqları fonunda hərbi hərəkətlilik

Maraqlıdır ki, bu hərbi hərəkətlilik İslamabadda ABŞ və İran nümayəndə heyətləri arasında atəşkəs və regional sabitliklə bağlı danışıqların başladığı vaxta təsadüf edir. Analitiklər hesab edirlər ki, ABŞ bu manevrlə həm ticarət sektorunu sakitləşdirir, həm də danışıqlar masasında Hörmüz boğazının statusunun toxunulmazlığını xatırladır.

Qeyd edək ki, Hörmüz boğazı qlobal neft ticarətinin təxminən beşdə birinin keçdiyi dünyanın ən kritik su keçididir.