BAKI,VOA Orxan Qədirzadə
İran rəsmiləri Hörmüz boğazında gəmi hərəkətinə nəzarətin Tehranın əlində olduğunu bildirərək ABŞ-ın bölgədəki mövqeyinə qarşı çıxıblar.
İran rəsmiləri boğazdan heç bir gəminin ölkənin icazəsi və nəzarəti olmadan keçə bilməyəcəyini vurğulayıb. İranın ali rəhbərinin müşaviri Məhəmməd Müxbir isə Tehranın tələbləri yerinə yetirilmədiyi halda “hücum xarakterli müharibə” strategiyasına keçə biləcəyini açıqlayıb.
ABŞ müdafiə naziri Pit Heqset isə ölkəsinin İrana tətbiq olunan dəniz blokadasını qeyri-müəyyən müddətə davam etdirə biləcəyini bildirib. ABŞ maliyyə naziri Skott Besent də İrana qarşı iqtisadi təcrid və Hörmüz boğazında blokadanın birləşdiriləcəyini deyib.
Bu arada Birləşmiş Ərəb Əmirlikləri İranı “Adnoc” şirkətinə məxsus iki neft tankerinə Hörmüz boğazında hücum etməkdə ittiham edib. Hadisənin bir həftə ərzində Adnoc tankerlərinə qarşı ikinci hücum olduğu bildirilir.
