BAKI,VOA
Pakistan rəhbərliyi ABŞ və İran arasında vasitəçilik missiyasını xilas etmək üçün son 24 saat ərzində diplomatik səylərini maksimum həddə çatdırıb. Məqsəd danışıqların planlaşdırıldığı kimi sabah, çərşənbə axşamı bərpa olunmasını təmin etməkdir.
VOA xəbər verir ki, İslamabad həm Vaşinqton, həm də Tehran ilə təmaslarını intensivləşdirib. Pakistan tərəfi danışıqlar masasının dağılmaması üçün tərəflər arasında sabir diplomatiya həyata keçirir.
"Reuters" agentliyi Pakistanın təhlükəsizlik mənbələrinə istinadən xəbər verir ki, Pakistan Ordu Komandanı, general Asim Münir ABŞ Prezidenti Donald Tramp ilə telefon danışığı aparıb. General Münir Trampa bildirib ki, Hörmüz boğazının mühasirədə qalması danışıqların qarşısında duran ən böyük maneədir. Mənbənin bildirdiyinə görə, Donald Tramp bu məsələyə yenidən baxacağına dair vəd verib.
Tehranın tərəddüdü: İkinci raund olacaqmu?
Pakistanın bu qızğın səylərinə baxmayaraq, İran tərəfindən gələn bəyanatlar prosesin üzərinə kölgə salır. İran Xarici İşlər Nazirliyinin sözçüsü İsmayıl Bəqayi hazırda ABŞ ilə danışıqların ikinci raundu üçün hər hansı bir planın olmadığını bildirib. Bu açıqlama Pakistanın vasitəçiliyi ilə keçirilən danışıqların gələcəyini ciddi sual altına qoyur.
