BAKI,VOA, Fərid Mikayılov

Yaxın Şərqdə gərginliyin artması qlobal aviasiya sektorunda yeni tendensiyaları gündəmə gətirib.

VOA xəbər verir ki, İranla bağlı hərbi hadisələr və Hörmüz boğazı ətrafında yaranan vəziyyət səbəbindən reaktiv yanacağın qiyməti kəskin artıb, bu isə aviaşirkətləri alternativ enerji mənbələrinə yönəldib.

Məlumata görə, ənənəvi reaktiv yanacağının qiyməti müharibədən əvvəlki dövrlə müqayisədə demək olar ki, iki dəfə artaraq ton başına 1500 dolları keçib. Bu artım aviaşirkətlərin gəlirliliyinə ciddi təsir göstərir.

Ekspertlər bildirir ki, mövcud vəziyyət SAF-a marağı artırıb. Biokütlədən, o cümlədən istifadə olunmuş yemək yağlarından istehsal edilən bu yanacaq mövcud mühərriklərlə uyğunluq təşkil edir və emissiyaları 80 faizə qədər azalda bilir.

Qeyd olunur ki, əvvəllər SAF-ın əsas problemi yüksək qiymət idi. Lakin ənənəvi yanacağın bahalaşması nəticəsində qiymət fərqi əhəmiyyətli dərəcədə azalıb və artıq iki dəfədən aşağı səviyyəyə düşüb.

Bununla yanaşı, Avropanın reaktiv yanacaq ehtiyacının təxminən 30 faizinin Körfəz regionundan təmin olunması Hörmüz boğazındakı vəziyyəti strateji riskə çevirib.

Mütəxəssislər bildirir ki, alternativ kimi e-SAF texnologiyası da gündəmdədir. Bu yanacaq növü yaşıl hidrogen və karbonun birləşdirilməsi ilə əldə olunur. Lakin onun maya dəyəri ənənəvi yanacaqdan dəfələrlə yüksəkdir.

Analitiklərin fikrincə, mövcud böhran fonunda investisiyalar daha çox yaşıl enerji və bioloji yanacaq istehsalına yönələcək.