BAKI,VOA, Fərid Mikayılov

Birləşmiş Ərəb Əmirlikləri İranın Abu-Dabi Milli Neft Şirkətinə məxsus tankerə qarşı pilotsuz uçuş aparatları ilə hücum etdiyini açıqlayıb.

VOA xəbər verir ki, ADNOC şirkəti ilə əlaqəli tanker Hörmüz boğazı ərazisindən keçərkən iki kamikadze pilotsuz aparat tərəfindən hədəfə alınıb.

BƏƏ Xarici İşlər Nazirliyi bildirib ki, hadisə nəticəsində xəsarət alan olmayıb. Qurum İranın bu addımını kommersiya gəmiçiliyinə qarşı yönəlmiş hücum və iqtisadi təzyiq vasitəsi kimi qiymətləndirib.

Açıqlamada vurğulanıb ki, mülki gəmilərin hədəfə alınması və Hörmüz boğazından təzyiq aləti kimi istifadə olunması qəbuledilməzdir.

Qeyd edək ki, son günlər regionda təhlükəsizlik vəziyyəti gərgin olaraq qalır və enerji daşımaları üçün mühüm əhəmiyyət kəsb edən bu marşrutda insidentlərin artması beynəlxalq narahatlığa səbəb olur.