BAKI,VOA Orxan Qədirzadə
Bəhreyn Daxili İşlər Nazirliyi İran İnqilab Keşikçiləri Korpusu və “Vilayəti-Fəqih” ideologiyası ilə əlaqəli olduğu bildirilən təşkilatın ifşa edildiyini və 41 nəfərin saxlanıldığını açıqlayıb.
VOA xəbər verir ki, nazirliyin yaydığı bəyanatda təhlükəsizlik orqanlarının uzunmüddətli araşdırmalar, təhlükəsizlik hesabatları və prokurorluq tərəfindən aparılan istintaq tədbirləri nəticəsində sözügedən şəbəkəni müəyyən etdiyi bildirilib.
Rəsmi məlumata görə, saxlanılan şəxslər xarici tərəflərlə əməkdaşlıq, casusluq fəaliyyəti və İranın Bəhreynə qarşı “düşmənçilik xarakterli fəaliyyətlərinə” simpatiya göstərməkdə ittiham olunur.
Bəyanatda qeyd olunub ki, hüquq-mühafizə orqanları saxlanılan şəxslərlə bağlı hüquqi prosedurları davam etdirir. Eyni zamanda təşkilatla əlaqəsi olduğu ehtimal edilən digər şəxslərin müəyyənləşdirilməsi istiqamətində əməliyyat-axtarış tədbirləri aparılır.
Hadisə fonunda Bəhreyn kralı Həməd bin İsa əl-Xəlifənin ötən ay verdiyi açıqlamalar da yenidən gündəmə gəlib. O bildirmişdi ki, ölkəyə qarşı həyata keçirilən “İran hücumu” dövlətin təhlükəsizliyi və sabitliyini hədəfə alıb.
Bəhreyn kralı bəyan etmişdi ki, bəzi şəxslər xarici qüvvələrlə əməkdaşlıq edərək ölkənin suverenliyinə qarşı fəaliyyət göstəriblər. O, bunu “bağışlanmaz xəyanət” kimi qiymətləndirmişdi.
Məlumata görə, son günlər Bəhreyndə İranla əlaqəli casusluq və təhlükəsizlik işləri üzrə bir sıra məhkəmə qərarları da qəbul olunub. Manama şəhərində yerləşən Ali Cinayət Məhkəməsi ayrı-ayrı işlər üzrə İran İnqilab Keşikçiləri ilə əməkdaşlıqda ittiham olunan şəxslərə ömürlük həbs cəzası verib.
Rəsmi məlumatlarda bildirilir ki, ümumilikdə müxtəlif işlər üzrə onlarla şəxs 5 ildən 10 ilədək həbs cəzasına məhkum edilib. Bundan əlavə, İranın fəaliyyətlərini dəstəkləməkdə ittiham olunan 69 nəfərin vətəndaşlıqdan məhrum edildiyi açıqlanıb.
Bəhreyn rəsmiləri qeyd edirlər ki, bu addımlar ölkənin təhlükəsizliyinin qorunması və daxili sabitliyin təmin olunması məqsədi daşıyır.
Qeyd edək ki, ABŞ və İsrailin fevral ayında İrana qarşı başladığı müharibədən sonra regionda təhlükəsizlik vəziyyəti daha da gərginləşib. İranın bölgədəki müxtəlif hədəflərə raket və pilotsuz uçuş aparatları ilə zərbələr endirməsi Körfəz ölkələrində təhlükəsizlik tədbirlərinin gücləndirilməsinə səbəb olub.
