BAKI,VOA, Fərid Mikayılov

İran İnqilab Keşikçilərin Korpusu (SEPAH) ABŞ və İsrailə yeni xəbərdarlıq mesajı ünvanlayıb.

VOA xəbər verir ki, qurum bəyan edib ki, İrana qarşı mümkün yeni hücumlar baş verərsə, qarşıdurma Yaxın Şərq sərhədləri ilə məhdudlaşmayacaq.

Bəyanatda İranın dünyanın “ən bahalı ordularına” qarşı dayanıqlılıq nümayiş etdirdiyi vurğulanaraq bildirilib ki, ölkənin əvvəlki müdafiə addımları bütün hərbi imkanların tam istifadəsi anlamına gəlmirdi.

Rəsmi açıqlamada qeyd olunub ki, Tehran indiyədək təmkinli mövqe nümayiş etdirsə də, ölkənin suverenliyinə qarşı yeni təhdidlər yaranacağı təqdirdə bu yanaşma dəyişə bilər.

İran İnqilab Keşikçiləri Korpusu həmçinin ABŞ və İsrail rəsmilərinin son açıqlamalarını sərt tənqid edərək onları “boş təhdidlər” adlandırıb. Bəyanatda tərəflərə İranın imkanlarını sosial media paylaşımlarında deyil, “real meydanda” görəcəkləri mesajı verilib.